له افغانستان څخه په جلاوطنې کې د افغان مېرمنو اعتراضي غورځنګ په کابل کې د طالبانو له لوري د ښځو او نجونو د نیولو او بشري وضعیت د ارزونې لپاره د حقیقت موندونکي پلاوي د لېږلو غوښتنه وکړه.
رخشانه: دغه اعتراضي غورځنګ نن (دوشنبې د چنګاښ ۳۰ مه) په یوه اعلامیه کې لیکلي«په ډېرې اندېښنې او غوسې سره دغه غیرقانوني نیونې او ښځې ځپوونکي اقدامات غندي او په دې برخه کې د نړیوالې ټولنې د فوري ځواب ویلو غوښتونکې دي.»
په جلا وطنی کې د افغان مېرمنو د اعتراضي غورځنګ په اعلامیه کې ویل شوي« طالبانو د پلازمېنې له بېلابېلو سیمو ځوانې نجونې یوازې د هغوی د جامو یا په راتلونکو لاریونونو کې د احتمالي ګډون په شک، د محکمې له حکم او د هغوی کورنیو ته له خبر ورکولو پرته نیولې دي.»
معترضو مېرمنو د طالبانو له لوري د ښځو سره چلند د بشري ښاري حقونو څخه ښکاره سرغړونه بللې وايي، دا عمل د افغانستان له عامه ساحې څخه د ښځو د ایستلو د سیستماتیکې پالیسۍ یوه برخه ده.
دوی د ښځو او نجونو توقیف د ۱۹۴۸ کال د بشري حقونو د نړیوالې اعلامیې، په ځانګړې توګه د هغې د ۳، ۵، ۹، ۱۹ او ۲۰ مادو کې د ذکر شویو اصولو څخه ښکاره سرغړونه ګڼلې ده.
یاد غورځنګ په هېواد کې د ښځو او نجونو پر وړاندې د طالبانو د محدویتونو په اړه ویلي، دا ډله په ورته وخت کې د ښځو په وړاندې د تبعیض د له منځه وړلو کنوانسیون او د مدني او سیاسي حقونو په اړه د ملګرو ملتونو د میثاق څخه سرغړونکې ده.
دوی له نړیوالې ټولنې په ځانګړې توګه له ملګرو ملتونو، د بشري حقونو شورا او د بشري حقونو د ملاتړو هېوادونو څخه غوښتي، چې د طالبانو د دغه اقدام پر وړاندې پټه خوله نه شي او د دې ډلې پر وړاندې اقدام وکړي.
معترضو مېرمنو د نیول شویو ښځو او نجونو د ژر تر ژره خوشي کېدو غوښتنه کړې وايي، باید کابل کې د دغه نیونو او بشري حقونو د وضعیت ارزولو لپاره یو حقیقت موندونکی پلاوی ولاړ شي.
هغوی د طالبانو پر مشرانو د بندیزو او له هغوی څخه د مالي ملاتړ د پرېکولو غوښتنه وکړه ویې ویل، چې نړیواله ټولنه باید د افغانستان د ښځو مدني مقاومت په رسمیت وپېژني او په دغه هېواد کې د ښځو حقونو د فعالانو د بېړنۍ ساتنې لپاره کړنلارې رامنځ ته کړي. په جلاوطنۍ کې د افغان ښځو د اعتراضي غورځنګ غړو د هغو ښځو لپاره د پناه غوښتنې د لارو چارو د اسانتیا او قانوني خوندیتوب غوښتنه کړې چې د طالبانو له مستقیم ګواښ سره مخ دي.
