په جلا وطنۍ کې د افغانستان د فوټبال ښځینه ملي لوبډلې، نړیوالو سیالیو کې د فیفا لوبلړۍ «فیفا ښځې سره یوو کوي» په چوکاټ د چاد فوټبال ښځینه لوبډلې څخه ماتې وخوړه.
رخشانه: دغه لوبه چې نن (یکشنبې د لړم ۴ مه) د کابل پر وخت د شپې ۹:۳۰ بجې مراکش کې تر سره شوه، د ۱-۶ پایلې سره د چاد ښځینه فوټبال ملي لوبډلې په بریا پای ته ورسېده.
د افغانستان یوازینۍ ګول وهوونکې منیژې نوري د لوبې په اوله نیمايي پاړنۍ کې پنالټي په تر لاسه کولو سره د سیالې لوبډلې دروازه خلاصه کړه.
دغه لوبه په لومړۍ نیمه پاڼۍ کې ۱-۱ برابره وه، خو په دویمه نیمه پاڼې کې په درندې پایلې ۱-۶ د چاد ښځینه فوټبال ملي لوبډلې په ګټه پای ته ورسېده.
په پیل کې ټاکل شوې وه، چې د «فیفا ښځې سره یو کوي» لوبلړۍ په متحده عربي اماراتو کې تر سره شي، خو دغه هېواد د افغانستان د ښځینه فوټبال ملي لوبډلې لوبغاړو ته ویزې ورنه کړې.
په هېواد کې د طالبانو له بیا واک ته رسېدو وروسته، دا لومړی ځل دی، چې په جلاوطنۍ کې د افغانستان د ښځینه فوټبال ملي لوبډله په نړیوالو سیالیو کې ګډون کوي.
په جلاوطنۍ کې د افغانستان د فوټبال ښځینه ملي لوبډلې به په راتلونکو ورځو کې د تونس او لیبیا له ملي ټیمونو سره ولوبېږي.
طالبانو د ۲۰۲۱ په اګست کې واک ته په بیا رسېدو سره د سختو محدودیتونو په لګولو سره ښځې له سپورت کولو بندې کړې او هېواد ښځینه ملي سپورټ هېڅ یوه لوبډله په رسمیت نه پېژني.
د طالبانو په بیا واک ته رسېدو سره د افغانستان د ښځینه فوټبال ملي لوبډلې غړې له هېواده وو تلې او دا مهال یې په اسټرالیا، برېتانیا، البانیا، پرتګال او امریکا کې پناه اخیستې ده.
