د کابل – کندهار پر لویه لار د غزني ولایت قرباغ ولسوالۍ کې د ترافیکي پېښې له آمله د ښځو او ماشومانو په ګډون څلورو تنو ژوند بایللی او ۱۶ تنه نور ټپيان شوي دي.
رخشانه: غزني کې د طالبانو امنیه قوماندانۍ په یوه خبرپاڼه کې ویلي، دغه پېښه د قرباغ ولسوالۍ په عسکر کوټ سیمه کې رامنځ ته شوې ده.
خبرپاڼه کې راوړل شوي، دغه ترافیکي پېښه له یوه باروړونکي مازدا موټر سره د سورلۍ د هایلکس موټر د ټکر له امله رامنځ ته شوې ده.
د خبرپاڼې پر بنسټ مازدا موټر کې له پاکستانه راستانه شوي کډوال د کندوز په لور د حرکت په حال کې وو.
غزني کې د طالبانو امنیه قوماندانۍ ویلي، دغه پېښه د ترافیکي قوانینو د نه رعایت کولو له امله رامنځ ته شوې ده.
دغه امنیه قوماندانۍ د دې پېښې د قربانیانو د عمر او هویت او د ټپیانو د روغتیايي حالت په اړه جزیات نه دي ورکړی.
تېره ورځ هم په پروان او کونړ ولایتونو کې د دوه ترافیکي پېښو له امله د ښځو او ماشومانو په ګډون شپږو تنو ژوند له لاسه ورکړی وو او شپږ تنه نور ټپیان شوي وو.
د یادونې ده، چې هر کال د ښځو او ماشومانو په ګډون لسګونه تنه د هېواد په ګوټ ګوټ کې د ترافیکي پېښو قرباني کېږي.
ډېری دغه پېښې د سړکونو د خرابوالي، موټرچلوونکو بې پروایۍ، د ترافیکي قوانینو نه پلي کول او د موټرو د زړښت له امله رامنځ ته کېږي.
