په جلاوطنۍ کې د افغانستان د ښځینه فوټبال ملي لوبډلې د «فیفا ښځې سره یو کوي» ټورنمنټ سیالیو په لړ کې خپله دویمه لوبه د تونس ښځینه فوټبال ملي لوبډلې ته ۰-۴ وبایلله.
رخشانه: د دې دواړو لوبډلو تر منځ سیالي د (لړم ۷ مه) د چهارشنبې په شپه د کابل پر وخت ۸:۳۰ بجې په مراکش هېواد کې تر سره شوه.
په جلاوطنۍ کې د افغانستان ښځینه فوټبال ملي لوبډلې په خپله لومړۍ سیالۍ کې د یکشنبې په شپه د (لړم ۴ مه) د چاد ښځینه فوټبال ملي لوبډلې څخه هم ۱-۶ سخته ماته خوړلې وه.
په راتلونکې سیالۍ کې به د افغانستان د ښځینه فوټبال ملي لوبډله د راتلونکې اوونۍ د شنبې په ورځ د لیبیا ښځینه فوټبال ملي لوبډلې سره ډګر ته ښکته شي.
د «فیفا ښځې سره یو کوي» ټورنمنټ سیالۍ په پیل کې ټاکل شوې وه، په متحده عربي اماراتو کې تر سره شي، خو دغه هېواد د افغانستان د ښځینه فوټبال ملي لوبډلې غړو ته ویزې ورنه کړې.
دا پر هېواد د طالبانو له واکمنۍ وروسته لومړۍ ځل دی، چې په جلاوطنۍ کې د افغانستان د ښځینه فوټبال ملي لوبډله په نړیوالو سیالیو کې ګډون کوي.
طالبانو واک ته په بیا رسېدو سره د ښځو په سپورت بندیز لګولی دي. د دې محدودیت له لګولو وروسته د افغانستان د ښځینه فوټبال ملي لوبډلې غړو افغانستان پرېښود او په استرالیا، برېتانیا، آلبانيا، پرتګال او امریکا کې یې پناه واخیسته.
