د افغانستان د پاراتکواندو لوبغاړې او د نړیوالې اولمپیک کمېټې د کډوالو لوبډلې لپاره د لومړي ځل مډال ګټونکې ذکیه خدادادي، د اروپا شورا «North-south prize» معتبره جایزه تر لاسه کړه.
رخشانه: دغه جایزه تېره ورځ (چهارشنبې د لړم ۷ مه) د پرتګال پارلمان کې د یو لړ رسمي مراسمو په ترڅ کې د دې هېواد د ولسمشر مارسلو ربلو د سوزا له خوا خدادادي ته ورکړل شوې ده.
مېرمن خدادادي پر خپل انسټاګرام پاڼه د دې جایز په ترلاسه کولو خوښي ښودلې او لیکلي یې دي: «دا جایزه ټولو ګډوالو، د افغانستان زړه ورو ښځو او لوبغاړو ته وړاندې کوم، چې هره ورځ د ښې راتلونکې لپاره هڅې کوي.»
هغې پر دوام لیکلي، د پاراالمپیک د یوې لوبغاړې او کډوالې په توګه باوري یم، چې سپورت یوازې سیالي نه ده، بلکې د انسانانو تر منځ ارتباطي پول او د یووالي او سولې لپاره د یو ځای کېدنې ځواک دی.
د پاراالمپیک نړیوالې کمېټې (IPC)هم اعلان کړی، چې د اروپا د شمال- جنوب شورا د دېرشمې دورې جایزې یو له ترلاسه کوونکو څخه ده.
د دې سپورتي بنسټ په اعلامیه کې راغلي، دا جایزه د دې بنسټ په نوښت په المپیک سیالیو کې د کډوالو لوبغاړو د ګډون فرصت برابرولو په پار هغې ته ورکړل شوې ده.
ذکیه خدادادي په خپله وینا کې ویلي دي: «غواړم په افغانستان او ټوله نړۍ کې ټولو ښځو ته و وایم، چې هیله ژوندۍ ده. تاسو یوازې نه یاستۍ، سپورت د سولې، خپلواکۍ او انساني کرامت نړیواله ژبه ده، زما پیغام زړه ورتیا ته رابلل دي: خوبونه و اوډۍ، د خپلو حقونو لپاره مبارزه وکړۍ او په ښې راتلونکې باندې ایمان ولرۍ.»
هغې پر دوام زیاته کړې، چې ځان یې «سپورت او سولې ته بښلی» دی، ځکه چې هغه د سپورت په ځواب باور لري، چې ژوند بدلوي او غواړي په سختو شرایطو کې د ښځو او ځوانانو غږ شي.
د اروپا د شمال- جنوب شورا جایزه هغه کسانو ته ډالی کېږي، چې د بشري حقونو د خوندیتوب، دېموکراسۍ د دفاع، یا د نړیوال متقابل تړاو او نړیوال پیوستون په اړه د عامه پوهاوي لوړولو کې یې غوره ونډه اخیستې وي.
