د ریاض ۲۰۲۵ اسلامي هېوادونو د پیوستون لوبو په چوکاټ کې، د افغانستان ښځینه ولیبال ملي لوبډلې له ایران څخه هم ماته ومنله.
رخشانه: د دغه دوه لوبډلو تر منځ لوبه نن (سه شنبې د لړم ۲۰ مه) له ماسپښین مخکې د سعودي عربستان ریاض ښار کې تر سره شوه.
د افغانستان د ښځینه ولیبال ملي لوبډلې په دې لوبه کې هم ۳-۰ په پایلې سره لوبه ایران وبایلله.
د هېواد ښځینه ولیبال ملي لوبډلې د دې لوبلړۍ په دوه مخکنیو لوبو کې هم تاجیکستان او ترکیې ته لوبې بایللې وې.
د افغانستان ښځینه ولیبال ملي لوبډله به سبا د اسلامي هېوادونو د پیوستون لوبلړۍ خپله وروستۍ لوبه له آذربایجان سره تر سره کړي.
د دې ټیم لارښود د افغانستان د نارینه وو ولیبال ملي لوبډلې مشر روزونکی دی.
دغه لوبډله د المپیک ملي کمېټې او د ولیبال نړیوال فدراسیون په همکارۍ له ایران، اسټرالیا او اروپايي هېوادونو څخه دغه لوبو ته لېږل شوی دی.
واک ته د طالبانو له راتګ وروسته د ښځو لپاره ټول سپورتي فعالیتونه ودرول شول او طالبانو اعلان وکړ، چې د ښځو سپورتي لوبډلې په رسمیت نه پېژني.
