د افغانستان ښځینه ولیبال ملي لوبډلې د ریاض ۲۰۲۵ اسلامي هېوادونو پیوستون لوبو په چوکاټ کې خپله وروستۍ لوبه آذربایجان لوبډلې ته وبایلله.
رخشانه: د دغه دوه لوبډلو ترمنځ لوبه نن (چهارشنبې د لړم ۲۱ مه) له ماسپښین وروسته د عربستان په ریاض ښار کې تر سره شوه.
د هېواد ښځینه ولیبال ملي لوبغاړو، دغه لوبه هم لکه مخکې درې نورې لوبې ۳-۰ د آذربایجان ښځینه ولیبال ملي لوبډلې ته وبایلله.
د محمد اسد الهلي شاګردانو د آذربایجان ښځینه ولیبال ملي لوبډلې ته په ماتې منلو سره د اسلامي هېوادونو پیوستون لوبلړۍ په پنځو ګډونوالو لوبډلو کې په پنځم ځای ودرېده.
د افغانستان د ښځینه ولیبال ملي لوبډلې لوبغاړي د المپیک ملي کمېټې او د ولیبال نړیوال فدراسیون په همکارۍ له ایران، اسټرالیا او اروپايي هېوادونو څخه دغه لوبو ته لېږل شوی دی.
واک ته د طالبانو له راتګ وروسته د ښځو لپاره ټول سپورتي فعالیتونه ودرول شول او طالبانو اعلان وکړ، چې د ښځو سپورتي لوبډلې په رسمیت نه پېژني.
