د بښنې نړیوال سازمان هرات کې پر ښځو د چادري اجباري کولو په غبرګون کې اعلان کړی، چې طالبان د دې محدودیت په لګولو سره، په افغانستان کې د ښځو او نجونو لپاره ژوند سخت کړی دی.
رخشانه: دغه بنسټ تېره ورځ ناوخته (چهارشنبې د لړم ۲۱ مه) په خپله اېکس پاڼه د یو پوسټ په خپرولو سره لیکلي، طالبانو د دې محدودیت په وضع کولو سره ښځې د ژوند له کابو ټولو برخو لرې کړې دي.
د بښنې نړیوال سازمان ټینګار کړي، چې طالبانو د پراخو محدودیتونو په لګولو سره، په منظم او سیستماتیک ډول له ښځو او نجونو د هغوی حقونه او انساني کرامت توږلی دی.
دغه بنسټ هرات کې پر ښځو د چادرۍ اجباري کولو ته په اشارې لیکلي، دغه محدودیت، به د ژوند روغتیايي څار ته د ښځو لاسرسی په شدیده توګه محدود کړي.
د بښنې نړیوال سازمان ویلي، نړۍ باید «د افغانستان د زړه وړو او غیرتي ښځو او نجونو» له حقونو په ملاتړ سره طالبان ځواب ویلو ته چمتو کړي.
طالبانو د تېرې اوونۍ د چهارشنبې په ورځ، دولتي ادارو او عمومي روغتونو ته د بې چادرۍ ښځو په ننوتلو بندیز ولګاوه.
دغې ډلې د دې محدودیت وروسته د هرات د حوزوي روغتون یوه ډاکتره او څو تنه کارکوونکې د چادرې نه اغوستو له امله څو ساعته نیولې او وروسته یې خوشې کړې وې.
د طالبانو دې اقدام د بشري حقونو د فعالانو، معترضو مېرمنو او بشري حقونو د بنسټونو غبرګونونه راوپارول.
هرات کې د ښځو لپاره د چادرۍ اجباري کولو او د طالبانو د امربالمعروف وزارت له خوا د دې محدودیت تر لغوه کولو یوه اوونۍ وروسته، سرچینې وايي، په دغه ولایت کې د طالبانو د امربالمعروف ځواکونه، ناروغه ښځو، ډاکترانو او مراجعینو ته، چې چادرۍ نه لري، دولتي ادارو او روغتونو ته د ننوتو اجازه نه ورکوي.
