هرات کې پر ښځو د چادري اغوستلو اجباري کولو په غبرګون کې له مدني ټولنې او خبریالانو د ملاتړ سازمان (CSJAO) د طالبانو دغه اقدام د ښځو له حقونو ښکاره سرغړاوی بللی دی.
رخشانه: دغه بنسټ نن (شنبې د لړم ۲۴ مه) په یوه پرېکړه لیک کې لیکلي «د [ښځو] په جامو کې هر ډول اجبار د فردي خپلواکۍ، انساني کرامت او د هغوی د حقونو» څخه ښکاره سرغړاوی دی.
د مدني ټولنې او خبریالانو د ملاتړ سازمان په پرېکړه لیک کې راغلي «د جامو اغوستل باید په خپله خوښه او شخصي ارادې پر بنسټ وي، نه د فشار او ګواښلو پر اساس.»
دغه بنسټ پر دوام ټینګار کړي، چې هېڅوک او حکومت حق نه لري، چې په خپله خوښه پر خلکو د جامو اغوستل تحمیل کړي.
د مدني ټولنې او خبریالانو د ملاتړ سازمان له ټولو ملي او نړیوالو بنسټونو غوښتي، چې په هرات کې د ښځو پر وضعیت په فعاله توګه څار ولري.
دغه بنسټ له نړیوالې ټولنې دا هم غوښتي، چې د هغه قوانینو او پرېکړو د پلي کولو مخنیوی وکړي، چې ښځې په ټولنه کې له خپلواکه حضور څخه منع کوي.
د مدني ټولنې او خبریالانو د ملاتړ بنسټ، د جامو اغوستل د انساني آزادۍ برخه بللې وايي، د جامو د خپلواکۍ سلبول د «انسانیت د لمنځه وړلو» په مانا ده.
طالبانو د تېرې اوونۍ د چهارشنبې په ورځ هرات ولایت کې د ښځینه ډاکترانو او کارکوونکو په ګډون دولتي ادارو او عمومي روغتونونو د بې چادرۍ ښځو د ننوتو مخنیوی وکړ.
د دې پرېکړې په ترڅ کې دغه ډلې یوه ښځینه ډاکتره د چادرۍ نه پوښلو له امله د څو ساعتونو لپاره نیولې او وروسته یې خوشې کړې وه.
په وروستي ځل کې هرات کې طالب ځواکونو یو نارینه ډاکتر د نجونو لپاره د یوې ښوونیزې دورې په جوړولو سره نیولی او نامعلوم ځای ته یې لېږدولی دی.
هغه ویډیوګانو کې چې د هرات په حوزوي روغتون کې د ښځینه ناروغانو سره د طالب ځواکونو له چلنده رخشانې رسنۍ ته رسېدلي لیدل کېږي، چې طالب ځواکونه د کمچینو په واسطه روغتون ته د بې چادرۍ ښځو د ننوتلو مخنیوی کوي.
