د افغان ښځو د سیاسي ګډون شبکې د نومبر د ۲۵ مې په نېږدې کېدو سره، چې د ښځو او نجونو په وړاندې د تاوتریخوالي د مخنیوي نړیواله ورځ ده، ویلي د ښځو او نجونو په وړاندې تاوتریخوالی یوازې یوه فردي مسله نه، بلکې یو ټولنیز او سیاسي بحران دی.
رخشانه: معترضو ښځو نن (پنشنبې د لړم ۲۹ مه) په یوه بیانیه کې لیکلي، چې تاوتریخوالی «د ژوند په ټولو برخو کې له کوره تر ډیجیټل فضا پورې ښځې او نجونې ګواښي.»
په بیانه کې راغلي «افغان ښځې او نجونې تر بل هر وخت د طالبانو په واکمنۍ کې تر بې مخینې محدودیتونو او ځپنو لاندې دي او ژوند یې هره ورځ له ښکاره او پټو ګواښونو سره مخ دی، دا وضعیت د انساني حقونو، عدالت او برابرۍ څخه ښکاره سرغړاوی دی.»
معترضو ښځو ویلي، د سږ کال شهار «ډیجیټل تاوتریخوالي ته نه» ویل دي او دا شعار دا یادونه کوي، چې د ښځو په وړاندې تاوتریخوالی یوازې فزیکي نه دی، آنلاین ګواښونه، ځورونه، تبعیض او د طالبانو له خوا په مجازي فضا د کرکې وینا هم د تاوتریخوالي د هغه ارټ برخه ده، چې ښځې او نجونې منزوي او زیانمنې کوي.
د افغان ښځو د سیاسي ګډون شبکې غړو ویلي، ښځه او نجلۍ حق لري، چې له وېرې، ګواښ، ځورولو یا تبعیض پرته له ډیجیټل فضا د زده کړو، اړیکو او ټولنیز ګډون لپاره ګټه واخلي.
دوی د افغان ښځو او نجونو د قانوني او ټولنیزو حقونو له هغې جملې د زده کړو، کارکولو او سیاسي ګډون حق د بېرته راستنېدو غوښتنه کړې ده.
معترضو ښځو له نړیوالې ټولنې غوښتي، چې د افغان ښځو او نجونو د ملاتړ لپاره خپل سیاسي او حقوقي فشارونه زیاته کړي او د بشري حقونو له بنسټونو وغواړي، چې د هغوی وضعیت تر څار لاندې ونیسي.
د افغان ښځو د سیاسي ګډون شبکې غړو ټینګار کړی، چې د ښځو په وړاندې تاوتریخوالی، هغه که په واټونو کې وي، که په کور کې او که په ډیجیټل فضا کې باید پای ته ورسول شي.
