د روادارۍ په نوم د بشري حقونو بنسټ په یوه راپور کې ویلي، د طالبانو تر واک لاندې افغانستان کې د اسماعیلیه مذهب لاروۍ ښځې، د خپل مذهبي، توکمي او جنسیتي هویت په دلیل له دوه ګوني تبعیض سره مخ دي.
رخشانه: د دې بنسټ په راپور کې چې نن (سه شنبې د مرغومي ۲ مه) خپور شوی راغلي، د طالبانو له بیا واک ته رسېدو وروسته، د اسماعیله مذهب لارویان له تبعیض او پراخې ځپنې سره مخ شوي دي.
راپور کې راوړل شوي، طالبانو په تېرو څلورو کلونو کې، په ځانګړې توګه د بدخشان ولایت په ځینو برخو کې، د اسماعیلیه وو په ماشومانو د حنفي فقې زده کول تحمیل کړي دي.
د روادارۍ بشري حقونو بنسټ ویلي، طالبان په ګواښلو، وېرولو، نیولو او شکنجه کولو هغوی د اسماعیلیه مذهب پرېښودو او د سني مذهب منلو ته هڅولي دي.
د دې راپور پر اساس، هغه میندونو او پلرونو چې د طالبانو دیني مدرستو ته یې د خپلو ماشومانو له لېږلو سره مخالفت کړی دی، په نغدي جرمانه، ربړونې، په وژلو ګواښنې او کور او مالونو ته یې د اور اچولو له ګواښونو سره مخ شوي دي.
دغه بنسټ زیاته کړې، په افغانستان کې د اسماعیلیه مذهب د لارویانو تر منځ د مذهبي هویت د څرګندولو وېره زیاته شوې او د مذهبي مراسمو تر سره کولو، د نورو خلکو په مراسمو کې د ګډون، په دولتي دفترونو کې د کار کولو او په اسماعیلیه کورنیو کې د واده کولو په ازادۍ سخت محدودیتونه لګول شوي دي.
د راپور له مخې، د منفي تبلیغاتو زیانوالی، ښکاره تکفیر، نفرت خورول او د ژبني تبعیض نور ټول ډولونه، د دې مذهبي او قومي لږکیو په وړاندې د طالبانو د تبعیضي او ځپوونکي چلند یوه بله برخه ده.
رواداري ویلي، ګواښل، له محکمې پرته وژنې، په زورکډه کول او په اسماعیلیه ټولنې پورې د اړونده املاکو او شتمنیو غصب، نورې هغه برخې دي، چې د هغوی پر امنیت، انساني کرامت او د بشري حقونو پر وضعیت باندې یې ژورې اغېزې پرېښي دي.
یاد بنسټ دغه راز زیاته کړې، د طالبانو تر بیا واکمنېدو وروسته، د افغانستان د اسماعیله ټولنې د بشري حقونو وضیت لا خراب شوی او کېدای شي د بشریت پر وړاندې جنایت برابر وګڼل شي.
رواداري لیکلي، د نړیوالو بشري حقونو اسنادو او په افغانستان کې د اسماعیلیه مذهب د لارویانو د بشري حقونو وضعیت ته په کتو، د هغوی پر وړاندې د سیستماتیک مذهبي ځورونې درېدا د ګټورو نړیوالو کړنلارو کارونې ته اړتیا لري.
یاد بنسټ له طالبانو غوښتي، چې په افغانستان کې د مذهبي خپلواکۍ پر وړاندې محدودونونکو اقداماتو او سیاستونو ته پای ورکړي او د اسماعیلیه ټولنې د غړو د بشري حقونو له سرغړواي څخه مخنیوی وکړي.
دغه راز رواداري له طالبانو غوښتنه کړې، چې د اسماعیلیه مذهب پیرو ماشومانو ته د سني مذهب اجباري ښوونې ودروي او د دې مذهبي ډلې د مذهب له بدلولو لاس په سر شي.
دې بنسټ له ملګرو ملتونو او نړیوالې ټولنې غوښتي، چې د دې مذهبي ډلې د ځپنې د مخنیوي لپاره عملي او ګټور ګامونه پورته کړي.
همدارنګه رواداري بنسټ د افغانستان د بشري حقونو لپاره د ملګرو ملتونو له ځانګړي راپور ورکوونکي غوښتي، چې د دې مذهبي ډلې د بشري حقونو د وضعیت په اړه پلټنې وکړي.
