د افغانستان د ولیبال ښځینه ملي لوبډلې د آسیا مرکزي زون سیالیو په خپله وروستۍ سیالۍ کې د بنګله دېش ولیبال ښځینه ملي لوبډلې څخه په ماتې سره، په دې سالیو کې څلورم مقام خپل کړ.
رخشانه: د دې سیالیو د درجه بندۍ لوبه نن (پنشنبې د مرغومي ۴ مه) له ماسپښین وروسته، د افغانستان او بنګله دېش تر منځ مالدیو کې تر سره شوه.
د افغانستان د ولیبال ښځینه ملي لوبډلې په دې سیالۍ کې ۰-۳ په مقابل کې له سیالې لوبډلې ماته ومنله او په څلورو ګډون والو لوبډلو کې یې څلورم مقام خپل کړ.
د محمد اسداللهي زده کوونکو له لومړۍ تر درېيمې پاڼۍ پورې په ترتیب سره د ۲۰- ۲۵، ۲۰ ۲۵ او ۱۵-۲۵ پایلې په ترلاسه کولو لوبه سیالې لوبډلې ته وبایلله.
هغوی تېره ورځ د آسیا مرکزي زون سیالیو په نیمه پایلوبه کې له قرغیزستان ملي لوبډلې ماته منلې وه.
د هېواد د ولیبال ښځینه ملي لوبډلې د دې سیالیو په ګروپي پړاو کې توانېدلې وه، چې بنګله دېش ته ۳-۱ په مقابل کې ماته ورکړي.
د آسیا مرکزي زون د ولیبال ښځینه لوبډلو تر منځ سیالۍ د روان کال د لیندۍ له ۲۹ مې د مرغومي تر څلورمې پورې د افغانستان، بنګله دېښ، قرغیزستان او کوربه مالدیو هېوادونو تر منځ تر سره شوې.
د هېواد د ولیبال ښځینه ملي لوبډلې په دې سیالیو کې پنځه لوبې (درې د ګروپي پړاو، یوه د نیمايي پایلوبې او یوه هم د درجه بندۍ لوبه) تر سره کړه، چې پایله یې څلور ماتې او یوه بریا وه.
په دې لوبلړۍ کې د بنګله دېښ ولیبال ښځینه ملي لوبډلې درېیم مقام تر لاسه وکړ او لومړی او دویم مقام به هم مالدیو یا هم د قرغیزستان لوبډلې تر لاسه کړي.
