هرات کې سیمه ییز طالب چارواکي وايي، د دې ولایت په اوبه ولسوالۍ کې د یوه کور د چت پرېوتو له کبله، د څلورو ماشومانو او یوې ښځې په ګډون پنځو تنو ژوند له لاسه ورکړی دی.
رخشانه: هرات کې د طالبانو د والي ویاند محمد یوسف سعیدي، سیمه ییزه رسنیو ته ویلي، دغه پېښه پرون (چهارشنبې د مرغومي ۱۰ مه) د اوبه ولسوالۍ د «کبکان» په کلي کې رامنځ ته شوې ده.
د هغه په وینا، د دې پېښې په پایله کې یوه ۳۲ کلنه ښځه له دو ۱۱ او ۷ کلنو لوڼو او دو ۳ او ۱۰ کلنو زامنو سره ژوند بایللی او د دې کورنۍ نارینه ټپي شوی دی.
هرات کې د طالبانو د والي ویاند زیاته کړې، چې دغه ښځه په کبکان کلي په روغتیايي مرکز کې یوازینۍ قابله وه.
د هغه په وینا، د دې کورنۍ پلار د درملنې په موخه د هرات حوزوي روغتون ته لېږدول شوی دی.
د دې سړي د روغتیايي وضعیت په اړه معلومات په لاس کې نشته.
له تېرو څو ورځو راهیسې د هېواد په یو شمېر ولایتونو کې واورې او بارانونه پیل شوي دي.
هر کال د ژمي په موسم او د پسرلي په لومړیو کې د ورته پېښو په ترڅ کې لسګونه کسان په ځانګړې توګه ښځې او ماشومان قرباني کېږي.
د ورښت په موسم کې د استوګنې ډېری کورنه د خام والي، زړښت او ناخوندیتوب له امله نړېږي.
