د امریکا د جورج ټاون پوهنتون د «ښځو، سولې او امنیت» موسسه په یوه راپور کې وايي، افغانستان د نړۍ د ۱۸۱ هېوادونو تر منځ، د ښځو لپاره تر ټولو بد هېواد پېژندل شوی دی.
رخشانه: په دې راپور کې، چې تازه خپور شوی راغلي، افغان مېرمنې د نړۍ د نورو مېرمنو په پرتله تر ټولو بد وضعیت تجربه کوي.
په راپور کې راوړل شوي، له افغانستان وروسته یمن، مرکزي افریقا، سوریې، سوډان، هائیټي او بروندي د هغه هېوادونو له ډلې دي، چې د ښځو لپاره ناسم او بحراني وضعیت لري او د جدول په پای کې ځای لري.
د «ښځو، سولې او امنیت» موسسې ویلي، په تېر یوه کال کې په دغو هېوادونو کې له هرو پنځو ښځو یوه یې په کور کې له تاوتریخوالي سره مخ شوې ده.
د دې راپور پر بنسټ، ډنمارک، ایسلډ، ناروې، سویډن او فنلنډ د ښځو لپاره تر ټولو غوره هېوادونه بلل شوي دي.
د «ښځو، سولې او امنیت» موسسې ویلي، دغه ارزونه په دریو اصلي حوزو، کډون، فرصتونو، عدالت او امنیت کې په ۱۳ ځانګړو شاخصونو کې تر سره شوې ده.
په دې شاخصونو کې زده کړو او روغتیايي خدماتو ته لاسرسی، په ټولنه کې د ښځو اقتصادي شتون، فردي خوندیتوب او له قانوني حقونو برخمن کېدل شامل دي.
راپور ټینګار کړی، چې افغان ښځې د خوندیتوب او عدالت ته د لاسرسي له پلوه په نړۍ کې په ټیټه کچه کې دي او د دې هېواد ښځې او نجونې لا هم د ډېرو زیان منوونکو ډلو په منځ کې پاتې دي.
د «ښځو، سولې او امنیت» موسسې ویلي، د طالبانو له بیا واک ته رسېدو وروسته، د ۲۰۱۷ کال په پرتله عدالت ته د ښځو په لاسرسي کې ۱۷.۵ سلنه کموالی راغلی دی.
افغانستان په ۲۰۱۷ کال کې د «ښځو، سولې او امنیت» د نړیوالو شاخصونو د خپرواي له پیل راهیسې تر اوسه پورې په تر ټولو ټيټو کچو کې ځای درلود.
افغانستان د ۲۰۲۳ کال راهیسې تر اوسه د دې شاخص په ټولو راپورونو کې ټیټ ځای درلود او همدارنګه په نړۍ کې د ښځو لپاره تر ټولو بد هېواد وو.
د ملګرو ملتونو د بشري مرستو د همغږۍ دفتر څه موده وړاندې په یوه راپور کې ویلي وو، طالبانو په تېرو څه باندې څلورو کلونو کې لږ تر لږه ۴۶۰ حکمونه صادر کړي، چې ۷۹ هغو یې مستقمیآ ښخې او نجونې تر برید لاندې نیولې دي.
د دې بنسټ په وینا، روان کال په افغانستان کې د طالبانو له لوري پر ښځو او نجونو محدودیتونه سخت شوي او د هېواد اقتصادي او ټولنیز جوړښت یې په ژوره توګه بدل کړی دی.
