دایکنډي کې سیمه ییز طالب چارواکي وايي، د دې ولایت په میرامور ولسوالۍ کې دوه ځوانو نجونو د ډبرو سکرو د ګاز نیونې له آمله ژوند بایللی دی.
رخشانه: دایکنډي کې د طالبانو د امنیه قوماندانۍ ویاند غلام علي جاوید ویلي، دغه پېښه د دوشنبې په شپه (د مرغومي ۱۵ مه) د میرامور ولسوالۍ د «ونکه اسکان» کلي په یوه درملتون کې رامنځ ته شوې ده.
د هغه په وینا، په دې پېښه کې دوه ځوانو نجونو، چې کابو ۱۷ او ۱۹ کلنې به وې، د ډبرو سکرو د خواره شوي دود له آمله ژوند له لاسه ورکړی دی.
جاوید زیاته کړې چې «له ذغالي بخارۍ څخه ناسمې ګټې اخیستنه او تړلی چاپېریال» د هغوی د مرګ سبب وو.
هغه له ښاریانو غوښتي، چې د تودوخې له توکو په ځانګړې توګه د ذغالي او ګازي بخاریو څخه د ګټې اخیستنې پر مهال، د خوندیتوب ټکي جدي په پام کې ونیسي.
هر کال د یخنۍ موسم په رارسېدو او د سونګ توکو او ډبرو سکرو د بیو لوړوالي له امله، د هېواد وګړي د کورونو د ګرمولو لپاره له ګازي بخاریو ګټه اخلي.
د ژمي په موسم کې د کورونو د ګرمولو لپاره له ګازي بخاریو د ګټې اخیستنه، د هېواد له وګړو قرباني اخلي.
