د افغانستان د خبریالانو مرکز (AFJC) اعلان کړی، چې اروزګان ولایت کې هم د ساه کښو د انځور او تصویري مرکو په خپرولو بندیز لګېدلي دي.
رخشانه: دغه مرکز نن (پنشنبې د مرغومي ۱۸ مه) په یوه اعلامیه کې لیکلي، دغه محدویت د دې ولایت د امربالمعروف ریاست له لوري لګول شوی دی.
اروزګان څلورويشتم ولایت دی، چې د طالبانو له لوري په رسمي ډول په رسنیو کې د ساه کښو د انځور په خپرولو بندیز لګول شوی دی.
له دې مخکې په کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندوز، بامیان، دایکنډي، فاریاب، پنجشېر، لغمان، سرپل، بلخ، هرات او پکتیا ولایتونو کې په رسمي ډول د ساه کښو انځور خپرول ممنوع شوي وو.
د خبریالانو مرکز لیکلي، د اروزګان د اطلاعاتو او کلتور ریاست تېر ورځ په یوه ناسته کې د دې ولایت سیمه ییزه خبریالانو ته لارښوونه کړې، چې رسنۍ باید د انځور له اخیستو او خپرولو ډډه وکړي.
اروزګان کې د طالبانو د اطلاعاتو او کلتور رییس عبدالحی عمري ویلي: «که چا له دې قانون څخه سرغړونه وکړه، قانون ماتونکی بلل کېږي او له هغه سره به قانوني چلند وشي.»
د خبریالانو مرکز ویلي، اروزګان کې د طالبانو د اطلاعاتو او کلتور د رییس په امر خبریالان باید انځور وانخلي او یا هم تصویر مرکه تر سره نه کړي.
دې مرکز زیاته کړې، د طالبانو دې امر د رسنیو لپاره کاري محدودیتونه لا سخت کړي او د هغوی د فعالیتونو د درېدو یا هم د لسګونو تلوېزیونونو او راډیوګانو د ماهیت د بدلون سبب شوی.
د افغانستان د خبریالانو مرکز په رسنیو کې د ساه کښو د انخور په خپرولو بندیز غندلی وايي، دغه محدودیت اطلاعاتو ته د خلکو لاسرسی چې له وړاندې لا محدود وو، نور هم سختوي.
دغه مرکز له طالبانو غوښتي، د دې امر د لغوه کولو په اړه بیا فکر وکړي، او د رسنیو د فعالیت لپاره خپلواکه، اړینه او له وېرې پرته فضا برابره کړي.
د بیان د آزادۍ مرکز د تلوېزیون د نړیوالې ورځې په مناسبت ویلي وو، چې طالبانو په تېرو څلورو کلونو کې د تلوېزیونونو د فعالیت په اړه ۲۳ لارښوودي صادر کړي او په تېر یوه کال کې، لږ تر لږه ۱۵ تلوېزیونونه د طالب چارواکو په مستقیم امر تړل شوي دي.
طالبانو په تېرو څه باندې څلورو کلونو کې، پر رسنیو، او د رسنیو په فعالیتونو د محدودیتونو په لګولو سره، د لسګونه، غږیزو، تصویري او چاپي رسنیو د بندېدو لامل شوي او څو تنه خبریالان او د رسنیو کارکوونکي او فعالان یې نیولي او زنداني کړي دي.
