د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ، د طالبانو له بنده د کندوز د سیمه ییزې خبریالې ناظره رشیدي او هرات کې د ښځو د تکواندو روزونکې خدیجه احمدزاده د خلاصېدو غوښتنه کړې ده.
رخشانه: ښاغلي بنټ نن (سه شنبې د مرغومي ۲۷ مه) په خپله اېکس پاڼه د یوه پوسټ په خپرولو سره لیکلي، چې د دې ښځینه خبریالې او ښځینه تکواندو روزنکې په اړه سخت اندېښمن دی.
هغه لیکلي دي: «زه په کندوز کې د ناطره رشیدي او هرات کې د خدیجه احمدزاده د نیولو د دوامداره راپورونو په اړه سخت اندېښمن یم.
د افغانستان د بشري حقونو د چارو لپاره د ملګرو ملتونو ځانګړي راپور ورکوونکي، د طالبانو له بنده د هغوی د خوشي کېدو غوښتنه کړې ده.
کندوز کې سیمه ییزه ښځینه خبریاله ناظره رشیدي دوه اوونۍ وړاندې د سه شنبې په ورځ د (مرغومي ۱۶ مه) له کوره له وتلو وروسته نیول شوې وه.
د افغانستان د تکواندو د ملي لوبډلې غړې او د دې څانګې روزونکې خدیجه احمدزاده د تېرې اوونۍ د شنبې ورځ د (مرغومي ۲۰ مه) د هرات په جبرییل ښارګوټي کې د یوه پټ کلپ څخه د طالبانو د امربالمعروف ځواکونو له خوا نیول شوې ده.
پر دې ښځینه روزونکې سربېره د هغې پلار او هغه سړی، چې خپل کور یې دې پټ ښځینه کلپ ته ځانګړی کړی وو، هم له هغې سره نیول شوي او له څو ورځو وروسته، د طالبانو له بنده خوشي شوي دي، خو احمدزاده لا هم د طالبانو په بند کې ده.
د دې ښځینه خبریالې او د ښځو روزونکې نیولو په خواله رسنیو ګڼ غبرګونونه راپارولي دي. معترضې مېرمنې او د بشري حقونو فعالان، د طالبانو له بنده د دې دو تنو د ژر تر ژره خوشي کېدو غوښتونکي شوي دي. خو د خدیجه احمدزاده او ناظره رشید له نیول کېدو د لسو ورځو په تېرېدو سره، تر اوسه پورې د طالبانو له بنده د هغوی د خوشي کېدو په اړه کوم خبر په لاس کې نشته.
