د ملګرو ملتونو د سرمشني مرستیاله او د دغه سازمان د ښځو څانګې اجرايي مدیره سیما باهوس ویلي، د طالبانو له ظلم سره سره افغان ښځې امیدواره دي، چې یوه ورځ به خپلو هیلو ته ورسېږي.
رخشانه: هغې دغه څرګندونې تېره ورځ (دوشنبې د تلې ۱۴ مه) د ملګرو ملتونو د امنیت شورا غونډه کې، چې د «ښځو، سولې او امنیت» تر عنوان لاندې جوړه شوې وه، مطرح کړې ده.
د ملګرو ملتونو د سرمشني مرستیاله او د دغه سازمان د ښځو څانګې اجرايي مدیرې، ویلي، د افغانستان ۹۲ سلنه وګړي، باور لري، چې نجونې باید ښوونځیو ته ولاړې شي.
باهوس زیاته کړې، افغانستان کې ښځې سره له دې چې «هره ورځ د طالبانو تر ظلم لاندې ژوند کوي، خو تمه لري، چې یوه ورځ به خپلو هیلو ته ورسېږي.»
هغې د افغان ښځو هیلې «یوازې یوه آرزو، یا زغمونکې وسیله» نه، بلکې «یوه سیاسي بیانیه، یو باور او یو الهام» بللی دی.
نوموړې په افغانستان کې د طالبانو له لوري د ښځو او نجونو د اساسي حقونو او آزادیو پر وړاندې محدودیتونو ته په اشارې سره زیاته کړې، له افغانستان سره د مرستندویه بودجې په کمښت سره، د نجونو لپاره د زده کړو فرصت کمزوری شوی دی.
د ملګرو ملتونو د سرمشني مرستیالې او د دغه سازمان د ښځو څانګې اجرايي مدیره د «سولې د خبرو اترو په مېز کې د ښځو د شتون او د سوله ساتونکو، سولې جوړونکو او د بشري حقونو د مدافعینو په توګه د دوی د دومداره ملاتړ ډاډمنولو لپاره د مثبت اقدام» غوښتنه کړې ده.
نوموړې همدارنګه د «ښځو او نجونو پر وړاندې د تاوتریخوالي د پای ته رسولو، د ټیکنالوژیک جنسیت پر بنسټ د تاوتریخوالي د راڅرګنېدونکو بڼو سره د مقابلې او په حقیقي او مجازي فضا کې د ویجاړونکو کیسو سره د مبارزې» غوښتنه وکړه.
د «ښځو او نجونو پر وړاندې د جرمونو د عامیلینو لپاره د معافیت پای ته رسول، د نړیوالو قوانینو درناوی او منل، د وسلو خاموشه کول او د ښخو اجنډا بنسټیزه کول» د ملګرو ملتونو د دې چارواکې نورې غوښتنې وې.
