په یوه ګډه اعلامیه کې، د افغان ښځو لسګونو اعتراض کوونکو غورځنګونو د روسیې حکومت لخوا د طالبانو په رسمیت پیژندل رد کړي او دا یې «شرمناک» بې ایمانه د انساني او سیاسي ګام مخالف عمل بللی دی.
رخشانه: نن (جمعه د چنګاښ ۱۳ مه) د اعتراضي غورځنګونو په خبرپاڼه کې ویل شوي، د طالبانو په رسمیت پیژندل په ځمکه د واقعیت له پامه غورځول او په قصدي ډول په افغانستان کې د زرګونو سیستماتیک بشري حقونو سرغړونو څخه د سترګو پټولو په مانا دی.
د معترضو ښځو غورځنګونو ویلي، د روسیې حکومت د افغان ښځو او نجونو د اساسي حقونو او آزادیو په اړه د طالبانو سخت محدودیتونه له پامه غورځولي دي.
په اعلامیه کې ویل شوي، د طالبانو ډله د خلکو استازې او د افغانستان د ګټو ساتونکې نه، بلکې یوه ایډیالوژیکه، له تاوتریخوالي ډکه او شاته تګ لرونکې ډله ده او افغانستان یې په داسې یو هېواد بدل کړی چې ښځې پکې له خپلو اساسي بشري حقونو څخه بې برخې دي او د آزادۍ غږ غلی شوی دی.
د معترضو ښځو غورځنګونو ویلي، د روسیې لخوا د طالبانو په رسمیت پیژندل «نه یوازې د ظالم رژیم سره سیاسي ملګرتیا ده، بلکې د افغانانو، په ځانګړې توګه د ښځو د مبارزو لپاره ښکاره سپکاوی او په نړیواله کچه د بشري حقونو د اصولو روښانه کمزورتیا ده.»
دوی په نړیواله ټولنه، نړیوالو ادارو او مسؤلو حکومتونو غږ وکړ چې د «د یو مطلق العنان، ښځو ضد او تاوتریخوالي ډک رژیم د پیژندلو» په وړاندې چوپ پاتې نه شي.
د روسیې د بهرنیو چارو وزارت پرون ماښام اعلان وکړ چې په رسمي ډول یې په افغانستان کې د طالبانو حکومت په رسمیت پیژندلی دی. تر دې مخکې د طالبانو د بهرنیو چارو وزارت هم اعلان کړی و چې روسیې په رسمي ډول دا ډله په رسمیت پیژندلې ده. په هېواد کې د طالبانو له څلورو کلونو واکمنۍ وروسته، روسیه لومړنی هېواد دی چې په رسمي ډول یې د طالبانو حکومت په رسمیت وپیژاند.
