د بیان د آزادۍ مرکز (FSC) د طالبانو د نوې کړنلارې، چې سرلیک یې «په افغانستان کې د سیاسي پروګرامونو د مدیریت پالیسي» ده، په ځواب کې ویلي دا لارښود تقریبا د بیان د آزادۍ لپاره هېڅ ځای نه دي پرېښودی.
رخشانه: دغه رسنیز بنسټ (پنشنبې د چنګاښ ۱۳مه) په خپله ایکس پاڼه کې د یوې اعلامیې په خپرولو سره د طالبانو دا کړنلاره غندلې ده.
د بیان د آزادۍ مرکز لیکلي: «دا سیاست د ۲۰۲۱ کال په اګست کې د طالبانو له واک ته رسېدو راهیسې د مطبوعاتو پر آزادۍ او خپلواک ژورنالیزم یو بل سخت ګذار دی.
دا مرکز د اطلاعاتو او کلتور وزارت نوی لارښود په رسنیو کې د سیاسي مسلو په اړه د بحث پر لارو چارو بې ساري کنټرول ګڼي، چې د بیان د آزادۍ لپاره هېڅ ځای نه پریږدي.
د دې کړنلارې له مخې، د سیاسي پروګرامونو د ټولو منځپانګو مخکې له مخکې تصویب لازمي دی او د پروګرامونو تولیدونکي باید موضوعات هره ورځ د لومړني تصویب لپاره د اطلاعاتو او کلتور وزارت ته وسپاري.
د بیان د آزادۍ مرکز ویلي:«دا کړنلاره د طالبانو د بیاناتو سره ایډیالوژیکي سمون پلي کوي او له خبریالانو، شنونکو او د سیاسي خبرو اترو کارپوهانو څخه غواړي چې د طالبانو لخوا صادر شوي پیژندپاڼې ترلاسه کړي.»
همدارنګه، د نویو لارښود له مخې، سیاسي کارپوهان باید د طالبانو ډلې نظرونو ته خپله وفاداري ثابته کړي، او هېڅ شنونکی یا کارپوه اجازه نه لري چې د طالبانو د بیانیو پر ضد خبرې وکړي.
د بیان د آزادۍ مرکز دا نوی لارښود د «شمالي کوریا، چین او ایران لخوا کارول شوي د رسنیو د کنټرول تاکتیکونو» سره ورته بولي، کوم چې یوازې دولتي رسنیو ته د فعالیت اجازه ورکوي.
دغه مرکز ویلي:«د دې ځپونکو اقداماتو په غوره کولو سره، طالبانو د سیاسي ژورنالیزم لپاره په نړۍ کې یو له خورا دښمنانه چاپیریالونو څخه رامنځته کړی دی.»
دې رسنۍ د طالبانو نوې کړنلاره د مخالفت د خاموشولو، د بحثونو د له منځه وړلو او د ویرې او څارنې له لارې د ډلې د ایډیالوژۍ د منلو او زغم هڅه بللې ده.
د بیان د آزادۍ مرکز، د طالبانو لخوا د رسنیو او رسنیزو فعالیتونو محدودیتونو ته په اشارې سره زیاته کړې، په افغانستان کې خبریالان له ګواښونو او ځورونو سره مخ دي.
دا مرکز د هغو خبریالانو ملاتړ ته ژمن دی چې د حقیقت ویلو له لارې د طالبانو د ظلم په وړاندې مقاومت کوي.
د بیان د آزادۍ مرکز په نړیواله ټولنه او د رسنیو ملاتړ کونکو سازمانونو غږ کړی چې د افغان خبریالانو ملاتړ وکړي.
