د بښنې نړیوال سازمان له ایران څخه د افغان کډوالو ایستلو د درېدو غوښتنه وکړه وايي، دغه هېواد باید افغان ښځې او نجونې د لومړنیو کډوالو په توګه وپېژني.
رخشانه: دغه بنسټ تېره ورځ (جمعه د چنګاښ ۲۷ مه) په خپله اېکس پاڼه د یوې اعلامیې په خپرولو سره لیکلي چې ایراني چارواکي باید ژر تر ژره د افغان کډوالو پراخ ایستلو او هغه کسانو چې په ایران کې زېږېدلي ایستل ودروي.
د بښنې نړیوال سازمان په اعلامیه کې راغلي، چې ایران باید د کډوالو ستنولو د اصل ماتونې ته نور د پای ټکی کېږدي ځکه د هغه کسانو ستنول چې د بشري حقونو د نقض له خطر سره مخ دي ممنوع دي.
په اعلامیه کې ویل شوي«ټول هېوادونه له دې ډلې ایران باید افغان ښځې او نجونې د لومړنیو کډوالو په توګه په رسمیت وپیژني او هغوی هغه ځای ته چېرته چې طالبان د بشريت پر وړاندې جنایتونو ځورونې او جنسیتي توپیر تر سره کوي ستانه نه کړي.»
د بښنې نړیوال سازمان ویلي، د ایران حکومت په تاوتریخوالي سره افغان نارینه، ښځې او ماشومان د دوی په کورونو «په یرغل» کولو سره په خپل سر نیسي او په زور یې له هېواده شړي.
دغه بنسټ زیاته کړې، چې ایران په روان میلادي کال کې د ښځو او بې سرپرسته ماشومانو په ګډون له یو نیم میلیون څخه زیات افغان کډوال له دغه هېواد څخه ایستلي دي.
د بښنې نړیوال سازمان ویلي، له ایران څخه د افغان کډوالو ډله ییز اخراج په داسې حال کې ترسره کیږي چې «په افغانستان کې د بشري حقونو بحران» روان دی. د دغه بنسټ په اعلامیه کې ویل شوي ډېری هغه کسان چې په «اجباري توګه) افغانستان ته ستنول شوې په کې هغه له ګواښ سره مخ ښځې او نجونې دي، چې یا معترضې دي، یا د بشري حقونو فعالینې او یا هم خبریالانې.
