د کرکټ نړیواله شورا (ICC) اعلان کړی دی، چې د افغانستان کرکټ ښځينه ټيم به په دوه نړیوالو لوبو کې د ګډون فرصت تر لاسه کړي.
رخشانه: د کرکټ نړیوالې شورا تېره ورځ (یکشنبې د چنګاښ ۲۹ مه) ناوخت مهال د یوې اعلامیې په خپرولو سره چې دا تصمیم سنګاپور کې په نړیواله غونډه کې نیول شوی دی.
د کرکټ نړیوالې شورا ویلي، چې د افغانستان د کرکټ ښځینه ټيم به د ښځو ۲۰۲۵ نړیوال جام او دغه راز راتلونکی کال په انګلستان کې په شل اوریزه جام کې هم ګډون وکړي.
د دغه شورا په اعلامیه کې راغلي دي:«د بې ځایه شویو افغان ښځینه کرکټ لوبغاړو د ملاتړ لپاره، دا لوبغاړي به په نړیوالو سیالیو، روزنیزو پروګرامونو، کورنیو سیالیو او د مهارتونو د پراختیا نوښتونو کې د ګډون فرصتونه ترلاسه کړي.»
د ۲۰۲۱ کال په اګست کې د طالبانو له واک ته رسېدو وروسته د افغانستان د ښځو د کرکټ ټیم غړو په اسټرالیا کې پناه واخیسته.
د کرکټ نړیوالې شورا په دې وروستیو کې اعلان وکړ چې د افغان ښځو د کرکټ ټیم د ملاتړ لپاره یې یو ځانګړی مالي صندوق جوړ کړی دی. وروسته له هغه چې طالبانو د افغانستان کنټرول بېرته ترلاسه کړ، د ښځو او نجونو لپاره ټولې لوبې منع شوې او ډېری لوبغاړي اړ شول چې پټ شي یا له هېواده وتښتي.
