د بغلان امنیه قوماندانۍ اعلان کړی، چې د دغه ولایت په مرکزي بغلان ولسوالۍ کې د ځمکې پر سر جګړه کې د یوې ښځې په ګډون پنځه تنه وژل شوي او ۱۱ نور ټپیان شوي دي.
رخشانه: دغه پېښه نن سهار پنځه نیمې بجې (یکشنبې د چنګاښ ۲۹ مه) د مرکزي بغلان ولسوالۍ په شهر کهنه سیمه کې رامنځ ته شوې ده.
په خبرپاڼه کې ویل شوي، چې د دوه کورنیو غړو د ځمکې پر سر دعوا باندې جګړه کړې چې په پایله کې یې د یوې ښځې په ګډون پنځه تنه وژل شوي او یوولس نور ټپيان شوي دي.
د خبرپاڼې پر بنسټ د دغه پېښې څلور تنه ټپیان د همدې سیمې اوسېدونکي دي، چې له ښکېلو خواوو سره هېڅ اړیکې نه لري.
د بغلان ولایت امنیه قوماندانۍ د پېښې د ټپیانو د روغتیايي حالت په اړه څه نه دي ویلي.
د بغلان امنیه قوماندانۍ ویلي، چې د دغه جګړې په تړاو ۸ تنه نیول شوي دي.
له دې وړاندې هم یو شمېر ښځې او ماشومان د هېواد په ځینو ولایتونو کې د کورنیو اختلافاتو، د میراث پر تقسیم او د ځمکې او مالکیت پر سر شخرو قرباني شوي دي.
