د کابل په لوېدیځ کې سرچینې وايي، د طالبانو د امربالمعروف ځواکونو کابو ۳۰ ځوانې نجونې نیولې او په ښار کې یې ګزمې پراخې کړې دي.
رخشانه: د کابل په لوېدیځ کې څلورو عیني شاهدانو رخشانې رسنۍ ه ویلي، چې دغه ځوانې نجونې تېره ورځ شنبې(د چنګاښ ۲۸ مه) نیولې دي.
د رخشانې رسنۍ خبریالانو په کابل له شپږو سرچینو او عیني شاهدانو سره د طالبانو له لوري د نجونو د نیولو په اړه خبرې اترې کړې دي.
د سرچینې په وینا، طالبانو کابو ۲۰ نجونې د رسالت له کوڅې او شاوخوا ۹ نجونې نورې د «برچي سنټر» او ټانګ تېل سیمو څخه نیولې دي.
د رخشانې رسنۍ سرچینو زیاته کړې، چې د طالبانو د امربالمعروف ځواکونو له خوا نیول شوې نجونې د ۱۴ او ۱۹ کلونو تر منخ عمرو لرونکې وې.
د یوې سرچینې په وینا، د طالبانو ځواکونو یو شمېر نجونې د خپلو هټیو له داخل څخه و ایستلې او له ځان سره یې یووړې.
سرچینې زیاته کړې، چې نجونو مناسب حجاب درلود خو طالب ځواکونو هغوی ونیوې.
یوې بلې سرچینې رخشانې رسنۍ ته و ویل، د ژبې د زده کړو د یوه مرکز یوه مسوول ټولو نجونو ته خبرداری ورکړی چې له دې وروسته یې که مناسب حجاب نه درلود ټولګي ته د ننوتو اجازه نه لري.
د هغه په وینا، د حجاب په اړه د طالبانو د نویو سختیو له امله یو شمېر نجونو په ټولګي کې د حضور په ځای په انلاین بڼه زده کړو ته مخه کړې ده.
تر اوسه د دغه نجونو د خوشي کېدو په اړه دقیق خبر نشته او معلومه نه ده چې هغوی چېرته لېږدول شوې دي.
