د بشري حقونو یو شمېر فعالانو، د ښځو اعتراضي غورځنګونو غړو، مدني بنسټو او د افغانستان دیاسپورا المان هېواد ته په یوه سرخلاصي لیک کې دغه هېواد ته له طالبانو سره د سیاسي اړیکو د عادي کولو او دغه راز د افغان پناه غوښتونکو په اړه خبرداری ورکړی دی.
رخشانه: په دغه لیک کې چې تازه خپور شوی راغلي، د المان دولت دغه اقدام د بشري حقونو له بنسټیزه اصولو او نړیوالو ژمنو سره د دغه هېواد ښکاره سرغړونه ده.
د لیک لاسلیک کوونکو ټینګار وکړ چې طالبان، د بشري حقونو د منظم سرغړونکي او د جنسیتي توپیر د مرتکب په توګه، په افغانستان کې د ترهګرۍ، قومي تبعیض او د ښځو او نجونو د ظلم پر بنسټ یو سیسټم رامنځته کړی دی.
دوی په افغانستان کې د ښځو د اساسي حقونو او آزادیو په اړه د طالبانو پراخو محدودیتونو ته اشاره وکړه او وايي، د طالبانو سره هر ډول سیاسي ښکیلتیا د دولتونو له خوا د نړیوالو مکلفیتونو څخه سرغړونه ده.
د بشري حقونو فعالانو افغانستان ته د کډوالو د راستنېدو خطرونو ته اشاره کړې ویلي یې دي په اوسنیو شرایطو کې دا عمل هغو هېوادونو ته د کډوالو د نه راستنېدو د اصولو ښکاره سرغړونه ده چېرې چې دوی د ګواښ، شکنجې یا ورکېدو خطر سره مخ دي.
د بشري حقونو فعالانو د جرمني پر حکومت غږ وکړ چې د طالبانو سره د سیاسي او ډیپلوماتیکو اړیکو د عادي کولو پروسه ودروي او سملاسي افغانستان ته د کډوالو ستنولو پریکړه بېرته واخلي.
دوی د بشري مرستو په چمتو کولو او د ښځو او نجونو قومي او مذهبي اقلیتونو او د افغانستان د مدني ټولنې د ملاتړ په برخه کې د بشري حقونو اصولو ته د درناوي غوښتنه هم وکړه.
د لیک لاسلیک کوونکو ویلي د المان دولت باید د طالبانو مشران د بشري حقونو پر وړاندې د جرمونو او جنسیتي توپیر په خاطر په نړیوالو محکمو کې په قانوني توګه مسؤل وګڼي.
دا فعالان تمه لري چې د المان دولت به د بشري حقونو په اړه د رڼه او ژمن دریځ په غوره کولو سره د افغانانو ترڅنګ ودرېږي او له هر هغه عمل څخه به ډډه وکړي چې طالبانو ته مشروعیت ورکوي.
