کابل کې سرچینې وايي، د طالبانو د امربالمعروف ځواکونو د کابل ښار په «شهر نو» سیمه کې کابو سل ځوانې ښځې نیولې او یو شمېر یې له یوې شپې ورځې بند وروسته په ضمانت خوشې کړې دي.
رخشانه: کابل کې دریو سرچینو رخشانې رسنۍ ته تایید کړه، چې دغه ښځې د تېرې اوونۍ د چهارشنبې په ماښام (د چنګاښ ۲۵ مه) نیول شوې دي.
یو سرچینې د هویت پټ ساتلو په شرط رخشانې رسنۍ ته و ویل، چې دغه مېرمنې د ښار له منځ او ځینو روغتونو څخه نیول شوې او د طالبانو د امربالمعروف بندخونو ته وړل شوې دي.
د سرچینې په وینا، طالبانو دغه ځوانې مېرمنې د «حجاب) نه مراعت کولو په تور نیولې دي.
سرچینې ټينګار کړی، چې د طالبانو له لوري نیول شویو ډېری مېرمنو مکمل اسلامي حجاب درلود خو دغه ډلې هغوی هم نیولې دي.
په ورته وخت کې یوه بله سرچینه وايي، چې له نیول شویو ښځو څخه یو شمېر یې له یوې شپې او ورځې زندان څخه وروسته په ضمانت خوشې شوې دي.
په هغه انځوریزه ویډیوګانو کې چې په خوله رسنیو لاس په لاس کېږي لیدل کېږي، چې څو مېرمنې د طالبانو د ځواکونو له خوا کلابندې شوې دي.
یوه مېرمن په لوړ غږ طالبانو ته وايي:«موږ مو له ژوند، تحصیل او ښوونځي ته له تلو راګرځولې یو، نور څه غواړۍ؟ له خدایه و ډار شۍ!»
په ورته وخت کې د طالبانو د امربالمعروف وزارت ویاند سیف الاسلام خیبر په کابل کې د ښځو د نیول کېدو خبر رد کړی دی.
د طالبانو د امربالمعروف ځواکونو له خوا د دغه ځوانو ښځو نیول کېدو د بشري او ښځو د حقونو د فعالینو غبرګونونه راپارولي او د طالبانو له بند څخه یې د هغوی د فوري خلاصون غوښتنه کړې ده.
تر اوسه کره معلومه نه ده، چې نیول شوې ښځې ټولې خوشې شوې که لا هم د طالبانو په بند کې دي. سرچینو رخشانې رسنۍ ته د یو شمېر ښځو د خوشي کېدو پخلی کړی خو کره شمېره یې نه ده په ګوته کړې.
