غور کې ځايي سرچینې وايي، طالب ځواکونو د دې ولایت په لعل او سرجنګل ولسوالۍ کې دوې ځوانې نجونې نیولې دي.
رخشانه: لعل او سرجنګل کې یوې سرچینې د نوم نه ښودلو په شرط رخشانې رسنۍ ته ویلي، دغه دوه ځوانې نجونې نن (یکشنبې د چنګاښ ۲۹مه) د دغه ولسوالۍ په مرکز کې نیول شوې دي.
د سرچینې په وینا، طالبانو دغه دوه نجونې د «نامشروع اړیکو په تور» نیولې دي.
د رخشانې رسنۍ سرچینو زیاته کړې، چې دغه دوه ځوانې نجونې د لعل او سرجنګل ولسوالۍ د مرکز له «سرسقابه» سیمې نیولې دي.
د سرچینې د خبرو پر بنسټ، د طالبانو له لوري د دې دوه نجونو د نیولو پر مهال یوه بې هوښه شوې ده.
تر اوسه د دې نجونو د خلاصون په اړه معلومات نشته. د طالبانو د امربالمعروف ځواکونو په وروستیو څو ورځو کې کابو ۱۳۰ ځوانې نجونې د کابل ښار له بېلا بېلو سیمو د «دوی د خوښې وړ حجاب» نه لرلو په تور نیولې دي.
