د کابل په لوېدیځ کې سرچینې وايي، د طالبانو د امربالمعروف ځواکونو لسګونه ځوانې نجونې ونیولې او نامعلوم ځای ته یې وړې دي.
رخشانه: په کابل کې لږ تر لږه دریو سرچینو له رخشانې رسنۍ سره په خبرو کې تایید کړه، چې دغه ښځې نن (شنبې د چنګاښ ۲۸ مه) له غرمې وروسته د دشت برچي له بېلا بېلو سیمو څخه نیول شوې دي.
یوې سرچینې د هویت پټ ساتلو سره رخشانې رسنۍ ته و ویل، دغه ښځې د رسالت له کوڅې، احمدیان او برچي له سوداګریزه مرکزونو څخه نیول شوې او نامعلوم ځای ته وړل شوې دي.
د دغه سرچینې په وینا، طالبانو دغه ځوانې ښځې د «اسلامي حجاب» نه مراعت کولو په تور نیولې دي.
یوې بلې سرچینې رخشانې رسنۍ ته و ویل، چې د طالبانو د امربالمعروف ځواکونو د وسلو په زور څو ځوانې ښځې د برچي د ټانک تېل په سیمه کې رنجرې ته پورته کړې او نامعلوم ځای ته یې یووړې.
سرچینې زیاته کړې، چې د دې ښځو د نیولو پر مهال هېڅ ښځینه سرتېرې شتون نه درلود او هغوی د نارینه وو له خوا ونیول شوې.
بلې سرچینې رخشانې رسنۍ ته و ویل، چې له تېرو څو ورځو راهیسې په برچي کې د طالبانو د امربالمعروف ځواکونو شمېر زیات شوی دی.
د سرچینې په وینا، طالب چارواکو د زده کړو څو مرکزونو ته ویلي، چې نجونې له حجاب او ماسک پرته ټولګیو ته پرېنږدي.
په ورته وخت په هغه پیغام کې چې د کابل د لوېدیځ د دیارلسمې ناحیې د مخور شورا د رییس له خوا د دشتې برچي قومي مخورو ته په واټساپ کې لېږل شوی لیکل شوي دي، چې د طالبانو د امربالمعروف وزارت د کابل ښار ټولو حوزو ته مکتوبونه لېږلي، چې ښځې «څرنګه چې لازم دي» هغه ډول حجاب نه مراعت کوي.
د کابل ښار د دیارلسمې ناحیې د مخورو شورا د رییس په وینا، ښځې او نجونې باید په سمه توګه حجاب مراعت کړي«له هغې پرته (له هغوی سره) د شرعیت له حکم او قانون سره سم چلند کېږي.»
د کابل ښار د دیارلسمې ناحیې د مخورو شورا د رییس، د کوڅو له استازو، ګذر وکیلانو او سیمه ییزه ملا امامانو غوښتي، چې کورنیو ته نصحت وکړي تر څو اسلامي حجاب مراعت کړي.
طالبانو د تېرې اوونۍ د چهارشنبې په ورځ هم د کابل له «شهر نو» سیمې لسګونه ښځې نیولې وې. سرچینو ویلي و چې دغه ښځې هم د بد حجابۍ په تور د طالبانو له خوا نیول شوې وې چې یو شمېر یې له یوې شپې ورځې بند وروسته په ضمانت د طالبانو له بنده خوشې شوې.
