ننګرهار کې سیمه ییزه سرچینې وايي، د دغه ولایت په غني خېلو ولسوالۍ کې یوې ځوانې ښځې په ډزو ځان وژنه کړې ده.
رخشانه: په ننګرهار کې دوه سیمه ییزه سرچینو ویلي، پېښه پرون (جمعه د زمري ۳ مه) د دغه ولایت د غني خلېو ولسوالۍ اړونده سیمه کې رامنځ ته شوې ده.
د سرچینې په وینا، دغه ښځې د کورنیو ستونزو له امله ځان وژنه کړې ده.
یوې سرچینې د هویت پټ ساتلو سره رخشانې رسنۍ ته ویلي، دغه ښځې شاوخوا ۸ میاشتې وړاندې واده کړی وو.
د سرچینې په وینا، یادې ښځې د خپل مېړه د وسلې په واسطه ځان وژنه کړې ده.
سرچینې د ښځې د هویت او عمر په اړه څه نه دي ویلي.
یوې بلې سرچینې رخشانې رسنۍ ته ویلي، د دغې ښخې د کورنۍ اقتصادي وضعیت خراب وو.
ننګرهار کې سیمه ییز طالب چارواکو تر اوسه په دې اړه څه نه دي ویلي.
واک ته د طالبانو په بیا راتګ سره د هېواد په بېلا بېلو ولایتونو کې د ښځو او نجونو د ځان وژنې پېښې بې مخینې زیاتې شوې دي.
دغه پېښې ډېری، د کورني تاوتریخوالي، اقتصادي ستونزو او په هېواد کې د ښځو پر اساسي حقونو او آزادۍ د طالبانو د شدیدو محدویتونو له امله رامنځ ته کېږي.
