بدخشان ولایت کې سیمه ییزه سرچینې وايي، د یوې ماشومې جسد چې دوه ورځې وړاندې په کوکچې سیند کې ډوبه شوې وه موندل شوی دی.
رخشانه: د بدخشان ولایت مرکز فیض آباد ښار کې دوه سیمه ییزه سرچینو رخشانې رسنۍ ته ویلي، دغه ماشومه دوشنبې (د چنګاښ ۳۰مه) مازیګر ۵:۰۰ بجې د کوکچې په سیند کې ډوبه شوې وه.
د سرچینې په وینا، ماشومه حسنات نومېده او ۱۲ کلنه وه.
دغه پېښه هغه مهال رامنځ ته شوې، چې یاده نجلۍ له خپلې کورنۍ سره په یوه تفریحي سفر کې د کوکچې سیند ته لوېدلې او ژوند یې له لاسه ورکړی دی.
د ماشومې جسد تېره ورځ سه شنبې (د چنګاښ ۳۱ مه) د سیمې د خلکو له خوا د اوبو څخه را ایستل شوی دی.
څو ورځې وړاندې هم یوه ماشومه د کونړ په سیند کې ډوبه شوې وه او جسد یې څلور ورځې وروسته وموندل شو.
له دې وړاندې هم د د ښځو او ماشومانو په ګډون څو تنه د هېواد په یو شمېر ولایتونو کې په اوبو کې د ډوبېدو له امله خپل ژوند له لاسه ورکړی وو.
