لغمان کې د طالبانو سیمه ییز چارواکي وايي، د دې ولایت په قرغه يي ولسوالۍ کې د کوهي د اوبو پر سر د دوه کورنیو په جګړه کې یوه مېرمن وژل شوې او د یوې ښخې په ګډون درې تنه ټپيان شوي دي.
رخشانه: لغمان کې د طالبانو د امنیه قوماندانۍ ویاند محمد یونس یوسفزي ویلي، دغه پېښه تېره ورځ (چهارشنبې د زمري اوله) د دغه ولایت د قرغیو ولسوالۍ په عبدالرحیمزي سیمه کې رامنځ ته شوې ده.
لغمان کې د طالبانو د امنیه قوماندانۍ د ویاند په وینا، پېښه لومړی د دوه کورنیو د ښځینه وو تر منځ پېښه شوې او وروسته د دغه کورنیو نارینه وو پر یو بل ډزې کړې دي.
یوسفزي زیاته کړې، د دغه دوه کورنیو د ډزو په ترڅ کې یوه ښځه وژل شوې او د یوې ښځې په ګډون درې تنه نور ټپيان شوي دي.
نوموړي د پېښې د ټپيانو د روغتیايي وضعیت، هویت او عمر په اړه څه نه دي ویلي.
معلومه نه ده، چې د پېښې قربانیان له یوې کورنۍ دي، که له دواړو.
لغمان کې د طالبانو د امنیه قومانداني ویاند وايي، د پېښې په تړاو څو تنه نیول شوي او یو شمېر هم له سیمې تښتېدلي دي.
له دې وړاندې هم د هېواد په بېلا بېلو ولایتونو کې د ښځو او ماشومانو په ګډون یو شمېر کسان د ملکیت، میراث د وېش او شخصي اختلافاتو په جګړو کې قرباني شوي دي.
