د طالبانو د سترې محکمې له خوا د خپرې شوې اعلامیې پر بنسټ، دغه ډلې په روانه اوونۍ کې د دریو ښځو په ګډون ۱۰ تنه د هېواد په بېلا بېلو ولایتونو، پکتیا، جوزجان، تخار، کونړ او بلخ کې په عام محضر کې په دورو وهلي دي.
رخشانه: دغه کسان «د نامشروع اړیکو، له کوره تېښتې، له کوره د تښتولو او لواطت» په تور په عام محضر کې په دورو وهل شوي دی.
دوه تنه د تېرې یکشنبې په ورځ (د چنګاښ ۲۹ مه) د «نامشروع اړیکو» په تور په پکتیا ولایت کې په عام محضر کې ۳۵ دورې و وهل شول.
دغه راز یاد کسان، د پکتیا ولایت د زرمت ولسوالۍ د ابتدايي محکمې له لوري په ۱۸ میاشتې تنفذي بند هم محکوم شوي دي.
د (زمري اوله) د چهارشنبې په ورځ بیا د دوه ښځو په ګډون اووه تنه« د نامشروع اړیکو، له کوره د تښتې، له کوره د تښتولو او لواطت» په تور په جوزجان، تخار، کونړ او بلخ ولایتونو کې په عام محضر کې په دورو وهل شوي دي.
د طالبانو سترې محکمې لیکلي، په جوزجان ولایت کې د یوې ښځې په ګډون څلور تنه د «نامشروع اړیکو» په تور په عام محضر کې ۲۵ دورې و وهل شول.
معلومه نه ده، چې دا کسان په څو میاشتې بند محکوم شوي دی.
یادې محکمې دغه راز لیکلي، تخار کې بیا د یوې ښځې په ګډون دوه تنه «د نامشروع اړیکو، له کوره د تېښتې او له کوره د تښتولو» په تور په عام محضر کې ۳۹ دورې وهل شوي دي.
دا هم نه ده معلومه چې یادو کسانو ته څو میاشتې بند اورول شوی دی.
دغه راز د طالبانو محکمې اعلان کړی دی، چې کونړ ولایت کې یو تن د«لواطت» په تور په عام محضر کې ۳۹ دورې ووهل شو.
دغه کس د کونړ ولایت د نور ګل ولسوالۍ د طالبانو د ځايي محکمې له خوا په دوه میاشتې تنفذي بند هم محکوم شوی دی.
د (زمري ۲ مه) د پنشنبې په ورځ په بلخ ولایت کې یوه ښځه «د نامشروع» اړیکو په تور په عام محضر کې ۳۹ دورې وهل شوې ده.
معلومه نه ده، چې دغه ښځې ته څومره موده بند اورول شوی دی.
طالبانو تېره اوونۍ، په بلخ او سرپل ولایتونو کې د شپږو ښځو په ګډون ۲۰ تنه د «نامشروع اړیکو، له کوره د تېښتې، قمار، قتل، له واده مخکې د جنسي او تلېفوني اړیکې» په تور په عام محضر کې په دورو وهلي وو.
