د افغانستان د بشري حقونو مرکز(AHRC) په کابل کې د طالبانو له لوري په خپل سر د ځوانو نجونو او ښځو د نیولو نوې څپې د بشري حقونو د بنسټیزه اصولو په ځانګړې توګه د آزادۍ او شخصي امنیت د حق ښکاره سرغړاوی بللی دی.
رخشانه: د بشري حقونو دغه مرکز نن(سه شنبه د چنګاښ ۳۱ مه) په یوه اعلامیه کې لیکلي، چې په کابل کې لسګونه ځوانې نجونې او ښځې د طالبانو له لوري نیول شوې او نامعلوم ځای ته وړل شوې دي.
د افغانستان د بشري حقونو مرکز لیکلي، چې کابل کې د نجونو او ښځو د نیولو پر مهال طالبانو له هغوی سره د تاوتریخوالي او سپکاوي ډک چلند کړی او د هغوی کورنۍ یې د نیول شویو ښځو د برخلیک په اړه په پته خوله کېدو ګواښلې دي.
په اعلامیه کې راغلي:«دا وضعیت په داسې حال کې رامنځ ته کېږي، چې د هاګ نړیوالې محکمې د ښځو د پراخ او سیستماتیک ځورونې په دلیل د طالبانو د رهبر او سترې محکمې د مشر د نیولو امر صادر کړی دی.»
د افغانستان د بشري حقونو مرکز د نیول شویو کسانو د برخلیک او روغتیا په اړه اندېښنه ښودلې او ویلي یې دي چې طالبان «د خپل سرو نیونو، سیستماتیکو شکنجو او جنسي تېري په اړه تورې کارنامې» لري.
یاد مرکز خبرداری ورکړی، چې د طالبانو له خوا رامنځ ته شوې له وېرې او چوپتیا ډکه فضا کول شي ښخې او نجونې له عمومي برخو، تحصیل او مدني ګډون څخه خذف کړي، چې د هېواد د راتلونکې لپاره به نه جبرانېدونکې پایلې ولري.
د بشري حقونو دغه مرکز له نړیوالو بنسټونو غوښتي، چې د نیونې د دې نوې څپې پر وړاندې بېړنی غبرګون وښي او ټینګار یې کړی، چې دغه اقدام نه یوازې نیول شویو کسانو ته نېغ زیان رسوي، بلکې د افغانستان د ټولنې ټول رواني، ټولنیز او اقتصادي پاړکي تر نېغ اغېز لاندې راولي.
د افغانستان د بشري حقونو مرکز په ملګرو ملتونو پورې تړلو بنسټونو لکه د بشري حقونو عالي کمېشنرۍ او د ښځو پر وړاندې د تاوتریخوالي مخنیوي کمېسیون څخه غوښتي، چې په کابل کې د ښځو د خپل سره نیونې څپې پر وړاندې غبرګون وښيي او د دغه کړنلارې د درېدو لپاره بېړني ګامونه پورته کړي.
همدارنګه دغه مرکز د ملګرو ملتونو له امنیت شورا غوښتي، چې پر طالبانو خپل سیاسي او حقوقي فشارونه ډېر کړي او د دغه جنایت کوونکو پر وړاندې د نړیوالو حقوقي توکو څخه کار واخلي.
د افغانستان د بشري حقونو مرکز د ملګرو ملتونو له غړو هېوادونو، اسلامي هېوادونو، اروپايي ټولنې او د بشري حقونو د مدافع بنسټونو څخه هم غوښتي، چې د طالبانو له خوا د ښخو او نجونو خپل سره نیونې د بشریت پر وړاندې جنایت په توګه وغندي او د نیول شویو ښځو د شفاف خوشي کېدو لپاره د پلټنې غوښتونکي شي.
دغه راز د افغانستان د بشري حقونو مرکز د هاګ له نړیوالې محکمې غوښتي، چې د افغانستان دوسیې ته د یوه لومړیتوب لرونکي وضعیت په توګه ګړندۍ کړي او د طالبانو د نورو مشرانو په ځانګړې توګه د امربالمعروف وزارت د چارواکو په اړه چې د نجونو او ښځو په نیولو، ځورولو او شکنجه کولو کې دخیل دي صادر کړي.
یاد مرکز له اسلامي هېوادونو هم غوښتي، چې د طالبانو له خوا د ښځو خپل سرې نیونې په رسمي او ښکاره توګه وغندي او د ښځو پر وړاندې د تاوتریخوالي د توجیه کولو لپاره د مذهبي لارښوونو کارولو سره خپل دریځ په روښانه توګه بیان کړي.
این مرکز از کشورهای اسلامی خواسته است که بهطور رسمی و علنی بازداشتهای خودسرانه زنان توسط گروه طالبان را محکوم کنند و در برابر استفاده ابزاری از آموزههای دینی برای توجیه خشونت علیه زنان موضع خود را بهروشنی اعلام نمایند.
