پاکستان کې د افغان کډوالو تر منځ سرچینې وايي، پاکستاني پولیسو د کډوالو ایستلو نوې لړۍ ته زور ورکړی دی.
رخشانه: پاکستان کې د افغان کډوالو منځ کې یوې سرچینې نن (سه شنبې د زمري ۷ مه) رخشانې رسنۍ ته ویلي، پاکستاني پولیسو څو تنه ښځینه فعالانې نیولې دي.
یوې معترضې مېرمې په هغه غږیز پیغام کې چې رخشانې رسنۍ ته یې استولی ویلي، د افغانستان د ښځو د ملاتړ د نړیوالې شبکې مشره حماسه بدخشاني او ورور یې نیول شوي دي.
د سرچینې په وینا، مېرمن بدخشاني او ورور یې په (اسلام آباد کې د روسیې سفارت مخې ته د اعتراضي او کړکېچ ډکې غونډې» جوړولو په تور د پاکستاني پولیسو له لوري نیول شوي دي.
معلومه نه ده، چې د ښځو د حقونو دغه فعاله او ورور یې څه وخت او له کوم ځایه نیول شوي دي. د هغوی د نیول کېدو د ځای په اړه هم معلومات په لاس کې نشته.
هغه دغه راز په دې غږیز پیغام کې وايي، پاکستاني پولیس یې د سهار ۴:۰۰ بجې د کور دروازې ته ورغلي وو.
نوموړې ویلي:«پولیس له ۴ تر ۹ بجو پورې زموږ د دروازې شاه ته ولاړ وو، اخر د کړکیو د ښيښو په ماتولو سره کور ته د ننه شول او زموږ پاسپورټونه یې واخیستل.»
دغه معترضه مېرمن ادعا کوي، چې پاکستاني پولیسو د دوی پاسپورټونه اخیستي، دوی یې نیولې او «حاجي کمپ» ته یې لېږدولې دي.
پاکستان په دې وروستیو څو میاشتو کې د بشري حقونو د فعالانو، معترضه مېرمنو او د افغانستان د پخوانیو نظامیانو د ایستلو لړۍ ته زور ورکړی دی.
د پاکستان د دولت له لوري د افغان کډوالو د ایستلو لړۍ، د بشري حقونو د فعالانو او بشري حقونو د بنسټونو غبرګونونه له ځان سره لرل او له پاکستان څخه یې غوښتي، چې دغه لړۍ ودروي.
