د کابل لوېدیځ کې سرچینې وايي، د طالبانو له خوا د ښځو او نجونو د نیولو لړۍ په ترڅ کې د دې ډلې د امربالمعروف ځواکونو کابو پنځه شپږ ځوانې نجونې له دشت برچي سیمې نیولې دي.
رخشانه: د کابل لوېدیځ کې دوه سرچینو رخشانې رسنۍ ته ویلي، دغه ځوانې نجونې نن مازیګر (سه شنبې د زمري ۷ مه) د دشت برچي له بیست متره سیمې څخه نیول شوې دي.
د رخشانې رسنۍ سرچینې زیاته کړې، دغه ځوانو نجونو د ۱۳ او ۲۰ کلونو تر منځ عمرونه درلودل او طالبانو هغوی په تاوتریخوالي سره نظامي موټرو ته پورته او یو یې وړې.
معلومه نه ده، طالبانو دغه ځوانې نجونې په کوم دلیل نیولې، د رخشانې رسنۍ سرچینې وايي، هغوی «بشپړ حجاب» درلود.
د سرچینې په وینا، طالب مامورینو د نیونې پر مهال په لوړ غږ خبرداری ورکاوه، چې د دوی د خوښې وړ جامو نه درلودونکو ښځو سره به تر دې جدي چلند وکړي.
تر اوسه دا هم نه ده، معلومه چې یادې ځوانې نجونې چېرته لېږدول شوې دي.
تېره ورځ هم یو شمېر رسنیو د طالبانو د امربالمعروف ځواکونو له خوا په کابل ښار کې د یوې ډلې نجونو د نیولو خبر ورکړی وو.
دغه نجونې د کابل ښار د دولسمې ناحیې له سیمې نیول شوې او د طالبانو امنیتي حوزې ته وړل شوې وي.
تر اوسه د دې نجونو د خوشي کېدو په اړه کوم خبر نشته دی.
له دې وړاندې د کابل په لوېدیځ کې یوې کورنۍ ادعا کړې وه، چې ۱۷ کلنه لوري یې د طالبانو تر نیولو وروسته ورکه شوې ده.
طالبانو د تېرې اوونۍ په جریان کې د کابل ښار له بېلا بېلو سیمو کابو ۱۳۰ نجونې او ښځې د حجاب نه مراعت کولو په تور نیولې وې.
له دغه ښځو یو شمېر یې له یوې شپې ورځې زندان تېرولو وروسته په ضمانت د طالبانو له بدنده خوشې شوې وې.
د طالبانو له لوري کابل کې د نجونو او ښځو نیونې د معترضه مېرمنو او بشري حقونو د بنسټونو غبرګونونه راپارولي دي.
په افغانستان کې د بشري حقونو لپاره د ملګرو ملتونو ځانګړي راپور ورکوونکي، ریچارډ بنټ، د نیولو د نوې څپې په اړه اندېښنه څرګنده کړې، لیکلي یې دي، دا اقدامات د هغو محدودیتونو یادونه کوي چې د ۲۰۲۴ کال په لومړیو کې د طالبانو لخوا لګول شوي وو.
هغه ټینګار کړی وو، چې د نیولو په نوي پړاو کې، د ښځو سره د تاوتریخوالي او ناوړه چلند د زیاتوالي راپورونه خپاره شوي، چې دا په افغانستان کې د بشري حقونو وضعیت نور هم اندېښمنوي.
