د ښځو پر وړاندې د طالبانو د محدویتونو لړۍ په ترڅ کې سرچینې وايي، دغه ډلې په بلخ ولایت کې د کډوالو او بېرته راستنېدونکو چارو ریاست ته د ښځو ننوتل ممنوع اعلان کړي دي.
رخشانه: بلخ کې دوه سیمه ییزه سرچینو ویلي، دا پرېکړه شاوخوا لس ورځې وړاندې د بلخ ولایت د کډوالو ریاست له خوا شوې ده.
د طالبانو یادې پرېکړې هغه کورنیو ته اندېښنې راپورته کړې، چې تازه له ایران او پاکستان څخه راستنې شوي دي.
ګڼ شمېر ښځې چې له سرپرست پرته له ایران او پاکستان څخه را ایستل شوې وايي، د بشري مرستو تر لاسه کولو په موخه د کډوالۍ اسنادو د ثبت او راجستر پروسې طی کولو ته اړ دي، خو طالبان هغوی ته د کډوالو ریاست ته د ننوتو اجازه نه ورکوي.
یوې مېرمنې چې له خاوند پرته له ایران څخه را ایستل شوې ده، رخشانې رسنۍ ته ویلي، دوه ورځې وړاندې بلخ کې د طالبانو د کډوالو ریاست ته ورغلې، خو هغې ته د ننوتو اجازه ورنه کړل شوه.
نوموړې د طالبانو په دې کړنه د نیوکې تر څنګ و ویل:«مېړه مې ایران کې دی، زه او درې لورانې مې له ایران څخه را وایستل شو، دوه ورځې کېږي، چې د اسنادو د مراحلو د طی کولو په موخه د کډوالو ریاست ته راځم، خو طالبان د ننوتو اجازه نه راکوي تر څو د کډوالۍ پاڼه ثبت کړم.»
دغې ښځې له خپل بد اقتصادي وضعیت څخه اندېښنه څرګنده کړه وايي، د کډوالۍ د اسنادو له ثبت کولو پرته هېڅ ډول مرسته نه شي تر لاسه کولی.
یوه بله مېرمن چې تازه له ایران څخه را ایستل شوې، رخشانې رسنۍ ته وايي، د اسنادو له ثبت کولو پرته نه شي کولی بشري مرستې تر لاسه کړي.
هغې ویلي:«خاوند مې پنځه کاله وړاندې مړ شوی، زموږ وضعیت خراب دی، ان د خوړو ډوډۍ نه لرو، طالبان نارینه وو ته اجازه ورکوي، چې ریاست ته د ننه شي، خو ښځو ته نه، په دې صورت کې موږ ښځې له مرستو پاتې کېږو، نه پوهېږم ژوند څه ډول مخ ته یوسو.»
طالبانو په تېرو څلورو کلونو کې د ښځو او نجونو د اساسي حقونو او آزادۍ پر وړاندې سخت محدویتونه وضع کړي دي.
دغه ډلې ښځې او نجونې په دولتي ادارو، کورنیو او بهرنیو موسیسو او له کوره د باندې له کار کولو محرومې کړې دي.
