د نسیم سیمه ییزې راډیو د مسوول مدیر او دوه خبریالانو تر دویم ځلي نیول کېدو وروسته دې غږیزې رسنۍ اعلان کړی، چې له ۱۳ کاله فعالیت او «دایکنډي او بامیانو له خلکو سره تر همغږۍ» وروسته تړل کېږي.
رخشانه: د نسیم راډیو اړوند پانې نن (دوشنبې د زمري ۲۰ مه) په خپله فسبوک پاڼه د یوه پوست په کولو سره د خپل خپرنیز فعالیت د درولو خبر ورکړی دی.
نسیم راډیو لیکلي:«له غمه په ډک زړه باید و وایم، نور نه شو کولی دوام ورکړو، د نسیم رادیو خپرونې بندې» او «د چوپتیا په څپو کې ورکېږي.»
دغه سیمه ییزې راډیو چې په بامیان او دایکنډي کې یې فعالیت درلود، نه ده روښانه کړې، چې په کوم دلیل خپلې خپرونې بندوي.
نسیم سیمه ییزې راډیو خپل اورېدونکي او مخاطبان ستایلي او هغوی ته یې ډاډ ورکړ، چې د شرایطو په سمېدو سره به بېرته خپلې خپرونې پيل کړي.
تېره اوونۍ د طالبانو استخباراتي ځواکونو د دغې سیمه ییزې راډیو مسوول مدیر سلطان علي جوادي او دوه خبریالان مجتبی قاسمي او سیف الله رضايي ونیول او د دفتر توکي یې ترې ضبط کړل.
که څه هم دغه درې تنه خبریالان له څو ساعته نیولو وروسته د طالبانو له بند څخه خوشي شول، خو د هغوی د نیول کېدو لامل معلوم نه شو.
دغه درې سیمه ییز خبریالان د ۱۴۰۲ کال په اوړي کې هم د طالبانو استخباراتو په دایکنډي کې نیولي او کاري توکي یې ترې اخیستي وو.
طالبانو پر هېواد په خپله څلور کلنه واکمنۍ کې پر رسنیو او رسنیزو فعالیتونو سخت محدویتونه لګولي دي.
د دې محدویتونو په لګېدو سره د هېواد په ګوټ ګوټ کې ډېری خبریالان اړ شوي، چې رسنیز فعالیتونه پرېږدي او لسګونه غږیزې، انځوریزې او چاپي رسنۍ هم وتړل شي.
