له ایران او پاکستان نه د افغان کډوالو د ایستلو لړۍ په ترڅ کې د ماشومانو د خوندیتوب بنسټ اعلان کړی، چې په هرو ۳۰ ثانیو کې یو ماشوم له ایران او پاکستان څخه افغانستان ته ستنول کېږي.
رخشانه: دغه بنسټ نن (دوشنبې د زمري ۲۰ مه) پر خپله اېکس پاڼه د یوې اعلامیې په خپرولو سره لیکلي، له ایران او پاکستان څخه د ایستل شویو ماشومانو شمېر په «هرو ۱۵ دقیقو کې د یوه ډک ټولګي د نیمايي برخې سره سم دی.»
د ماشومانو د خوندیتوب بنسټ زیاته کړې، په روان میلادي کال کې له ۸۰۰ زره زیات افغان ماشومان له ایران او پاکستان څخه افغانستان ته لېږدول شوي دي.
په افغانستان کې د دغه بنسټ د مدافعی څانګې مسوولې سمیرا سیدرحمان ویلي، په اوس مهال کې د افغان وګړو د ایستلو کچه بې مخینې ده او دا بنسټ«د یوه بشپړ ناورین په درشل کې دی.»
هغې زیاته کړې:«له دې ماشومانو ډېری یې ستړي، وېرېدونکي او په داسې یوه هېواد کې ژوند ته اندېښنمن دي، چې په تېرو څلورو کلونو کې له سختې لوږې او بېوزلۍ سره لا او ګرېوان دی.»
د یاد بنسټ د مدافعې څانګې مسووله وايي، زرګونه ماشومان له کورنیو او اساسي خدماتو ته له لاس رسي پرته ستنول کېږي.
دغه بنسټ په ګاونډیو هېوادونو کې د ماشومانو زېږون او ودې ته په اشارې ویلي«ډېری هغه ماشومان چې افغانستان ته ستنول کېږي، خپل ټاټوبی نه پېژني.»
د ماشومانو د ساتنې بنسټ په وینا، ډېری ماشومان چې له سرپرست پرته افغانستان ستنېدلي، یوازې هغه توکي چې لېږدولی یې شي له ځان سره لري.
یاد بنسټ د دې ماشومانو د ستنولو په اړه د اندښنې څرګندونو په ترڅ کې وايي، له ایران او پاکستان څخه افغانستان ته د پراځې څپې د ایستلو د مخه، د دې هېواد کابو نیمايي وګړي بشري مرستو ته اړتیا لري او له هرو پنځو ماشومانو یو هغه یې د لوږې له ناورین سره مخ دی.
د ماشومانو د خوندیتوب بنسټ پراخه داخلي مېشتېدنې ته په اشارې راپور ورکړی، چې ډېری ماشومان د اقلیمي بدلون د پایلو له امله د خپلو کورنو پرېښود ته اړ شوي دي.
یاد بنسټ د افغانستان له ګاونډیو هېوادونو غوښتي، چې د افغان وګړو ایستنه باید په خپله خوښه، خوندیتوب او درناوي تر سره شي او د «ماشومانو د ستنولو لپاره به زور او فشار په ځانګړې توګه د هغو لپاره چې سرپرست نه لري، ښايي د ناوړه ګټې اخیستې، ځورولو او بې پروايۍ ګواښ زیات کړي.»
دغه راز د ماشومانو د ساتنې بنسټ له نړیوالې ټولنې غوښتي، چې د کډوالو لپاره په پولو او داخلېدو پر مهال بېړنۍ بودجه ځانګړي او په افغانستان کې د کډوالو د مېشتدنې لپاره اوږد مهاله مرستې زیاتې کړي.
یونیسف شاوخوا یوه میاشت وړاندې اعلان کړی وو، چې له ایران څخه ایستل شویو کډوالو کې یو پر څلورمه برخه هغه ماشومان دي، چې بېړنیو مرستو ته اړتیا لري.
د ماشومانو د ژغورنې نړیوال بنسټ هم په یوه راپور کې لیکلي، چې د روان میلادي کال په جون میاشت کې له ۸۰ زره زیات افغان ماشومان له ایران څخه افغانستان ته ستنېدلي دي.
یاد بنسټ ویلي وو، دغه شمېر د تېرې میلادي میاشتې په پرتله دوه برابره شوی، چې له دې ماشومانو شاوخوا شپږ زره او ۷۰۰ یې بې سرپرسته او کابو ۳۹ سلنه یې په زور له ایران څخه ایستل شوي دي.
