پر افغانستان د طالبانو د څلورکلنې واکمنۍ په درشل کې د ملګرو ملتونو د ښځو برخې (UN Women) اعلان کړی، چې طالبان له عامه ژوند نه د ښځو لرې کولو موخو ته نېږدې شوي دي.
رخشانه: یاد بنسټ تېره ورځ(دوشنبې د زمري ۲۰ مه) ناوخته د یوې اعلامیې په خپرولو سره لیکلي، طالبانو په څلورکلنه واکمنۍ کې د «ګڼو کړنلارو په پلي کولو سره افغان ښځې او نجونې له خپلو حقونو او عزت څخه محرومې کړي دي.»
د ملګرو ملتونو د ښځو برخې په اعلامیه کې راغلي، د طالبانو له لوري رامنځ ته شوي افغان ښځې نه دي«له دغه محدودیتونو ان یو هم نه دی لغوه شوی.»
اعلامیه کې راوړل شوي:«په نړۍ کې د ښځو د حقونو تر ټولو شدید ناورین د عادي کېدو له ګواښ سره مخ دی.»
د ملګرو ملتونو د ښځو برخې په افغانستان کې د ښځو او نجونو د حقونو او خپلواکیو پر وړاندې د طالبانو پراخو محدودیتونو ته په اشارې ویلي«ډېرې ښځې ان نه شي کولی په خپلو کورونو کې کومه پرېکړه وکړي.»
یاد بنسټ زیاته کړې، په پوهنتونونو کې د طب په برخه کې د ښځو د زده کړو او د هېواد په ځينو برخو کې د نارینه ډاکتر له خوا د ښځینه وو د درملنې مخنیوی، په دې مانا دی، چې ډېری مېرمنې د اړتیا وړ روغتیايي خدمات نه شي تر لاسه کولی.
د ملګرو ملتونو د ښځو څانګې د طب په برخه کې د ښځو د زده کړو د مخنیوي پایلې ورانوونکې بللې وايي، د دې محدودیتونو په نتیجه کې ښځې لنډ او ناروغ ژوند لري.
یاد بنسټ دغه راز ویلي، د طالبانو تر کنټرول لاندې افغانستان کې د میندو مړینه او د ماشومانو د [کم عمره ودونو] کچه په زیاتېدو ده او د ښځو پر وړاندې تاوتریخوالی هم زیات شوی دی.
د ملګرو ملتونو د ښخو برخې افغانستان کې د بشري حقونو سرغړونو ته په اشارې زیاته کړې، دا هېواد له یمن وروسته په نړۍ کې دویم هېواد دی، چې جنسیتي توپیر په کې خورا زیات دی.
د ملګرو ملتونو د یاد بنسټ په اعلامیه کې راغلي، انساني ناورین او ورسره هم مهالې بېوزلۍ د دې وګړو په ځانګړې توګه د ښځو او نجونو ژوند خورا سخت کړی دی.
د ملګرو ملتونو د ښځو څانګې په پای کې ټينګار کړی، چې د ښځو پر وړاندې له دې ټولو محدودیتونو سره سره«هغوی همدارنګه، خپل قدرت، زغم او زړورتیا ښودلې او د ټولو لپاره د یوه ښه افغانستان د جوړېدو په پار مباره کوي.»
یاد بنسټ له نړیوالې ټولنې غوښتي، چې خپلو حقونو ته د رسېدنې په موخه د افغان ښځو او نجونو ملاتړ وکړي او ویلي یې دي، نړۍ باید اوس اقدام وکړي.»
