واک ته تر بیا رسېدو وروسته د طالبانو د څلورکلنې واکمنۍ په درشل کې د افغان خبریالانو د ملاتړ بنسټ (AMSO) اعلان کړی، چې د دې څلورو کلونو په موده کې د خبریالانو پر وړاندې د تاوتریخوالي ۵۳۹ پېښې ثبت شوې، چې له دې یې ۴۸۷ د نارینه خبریالانو او ۵۲ نورې یې د ښځنه خبریالانو پر وړاندې دي.
رخشانه: یاد سازمان نن (پنشنبې د زمري ۲۳ مه) په خپله اېکس پاڼه د یوه راپور په خپرولو سره لیکلي، د تاوتریخوالي په دې پېښو کې«فزیکي بریدونه، وهل ټکول، نیول او ګواښل» شامل دي او د هغو په پایله کې لسګونو رسنیو خپل فعالیت درولی دی.
د افغان خبریالانو د ملاتړ بنسټ په راپور کې راغلي، دا مهال د طالبانو په زندانونو کې ۱۰ خبریالان پراته دي او د طالبانو تر واکمنۍ لاندې افغانستان کې د رسنیو آزادي او د خبریالانو فعالیتونه له بې مخینې «ګواښ» سره مخ دي.
دغه رسنیز بنسټ ټینګار کړی، چې په تېرو څلورو کلونو کې د رسنیو ۲۰ کارکوونکي وژل شوي، ۲۰ نور ټپيان او ۲۵۳ رسنیز کارکوونکي نیول شوي دي.
د افغان خبریالانو د ملاتړي بنسټ پر وینا، دغه راز د ګواښنې ۷۹، د وهلو ټکولو ۵۱۰، د غیرقانوني چلند ۵۹، د تښتونې ۵، د وژنې ۲، او د «تاوتریخوالي» نورې بڼې او ناوړه ګټه اخیستنه هغه پېښې دي، چې د خبریالانو پر وړاندې په دې تېرو څلورو کلونو کې ثبت شوې دي.
دغه رسنیز بنسټ زیاته کړې، پر افغانستان د طالبانو په څلورکلنه واکمنۍ کې معلوماتو ته لاس رسی محدود کړای شوی، د خبریالانو د ملاتړ بنسټونه او رسنۍ په دغه هېواد کې تر فشار لاندې دي او له شته وضعیت څخه د کره راپور ورکولو توان نه لري.
طالبانو پر رسنیو د سختو محدودیتونو پر پلي کولو سره لسګونه رسنۍ تړلې او ګڼ شمېر خبریالان او د رسنیو کارکوونکي بې کاره شوي دي.
