د ښځو د حقونو یوه فعاله وايي، ورور یې د روانې اوونۍ د شنبې له ورځې راهیسې د کابل لوېدیځ له دشت برچي سیمې ورک شوی دی.
رخشانه: شمایل توانا ناصری نن (چهارشنبې د زمري ۲۲ مه) پر خپله فسبوک پاڼه د خپل ورور د ورکېدو خبر ورکړی دی.
هغې لیکلي:«یوازینی ورور مې د شنبې ورځې د سهار له ۹ بجو راهیسې کورس ته پر لار په دشتي برچي سیمه کې ورک شوی او تر اوسه یې هېڅ پته لاس ته نه ده راغلې.»
د ښځو د حقونو دغې فعالې د خپل ورور د هویت او عمر په اړه څه نه دي ویلي.
د هغې په وینا، څو ورځې وړاندې یې د ورور تلېفون د څو دقیقو لپاره روښانه وو، خو له ځنډ پرته بېرته غلی شو.
دغې فعالې د خپل ورور د ورکېدو څخه په اندېښنه لیکلي، چې دا او کورنۍ یې د خپل ورور د برخلیک په اړه سخت اندېښمن دي.
نوموړې ټینګار کړی، چې د ښخو د حقونو د یوې مدافع په توګه چې د آزادۍ، عدالت او برابري لپاره هڅې درنده بیه لري، «یو ځل بیا له دې ترخه حقیقت» سره مخ شوې ده.
د ښخو د حقونو دغې فعالې له داخلي او بهرنیو مسوولو بنسټونو غوښتي، چې د ورور د برخلیک په معلومولو کې ورسره مرسته وکړي.
رخشانه رسنۍ، په خپلواکه توګه د ښځو د حقونو د دغې فعالې د ورور د ورکېدو پخلی نه شي کولی.
