د افغانستان د ښځو د یووالي او پیستون اعتراضي غورځنګ پر افغانستان د طالبانو د واکمنۍ د څلورمې کلیزې په درشل کې اعلان کړی، چې د مخنکي نظام له پاشل کېدو او له هېواده د اشرف غني له تېښتې وروسته د ښځو غږ چوپ کړای شوی دی.
رخشانه: د دغه اعتراضي غورځنګ غړو نن (چهارشنبې د زمري ۲۲ مه) په یوه پرېکړه لیک کې لیکلي، د ۲۰۲۱ کال د اګست پنځلسمه د افغانستان د خلکو لپاره د یوې«بې رحمه، افراطي او ښځو ځپوونکي» ډلې د واکمنېدو یادونه کوي.
په پرېکړه لیک کې راغلي، طالبانو په افغانستان کې بیا واک ته تر رسېدو وروسته «د یوه ملت خپلواکي، زده کړې او ارزوګانې برمته کړې دي»
معترضو مېرمنو په افغانستان کې د ښځو او نجونو پر وړاندې د زده کړو محدودیتونو ته په اشارې ویلي، په دې محدودیتونو سره د ځوانانو خوبونه له منځه وړل شوي دي.
د ښځو د یووالي او پیستون اعتراضي غورځنګ غړو زیاته کړې، دوی به «د [طالبانو له لوري] دا اشغال او واکمني هېڅکله ونه مني.»
هغوی له نړیوالې ټولنې غوښتي، چې د افغانستان د خلکو تر څنګ ودرېږي او د طالبانو د جنایتونو او ځپنو پر وړاندې چوپتیا غوره نه کړي.
معترضو مېرمنو ټینګار کړی، چې د افغانستان د خلکو د «خپلواکۍ، برابرۍ او انساني کرامت» لپاره به خپلې مبارزې ته دوام ورکړي.
