د طالبانو د سترې محکمې له لوري د خپرې شوې اعلامیې پر بنسټ دغه ډلې روانه اوونۍ د څلورو ښځو په ګډون ۴۰ تنه د بېلا بېلو تورونو له امله په کابل، پکتیا، خوست او سرپل ولایتونو کې په عام محضر کې په دورو وهلي دي.
رخشانه: دغه کسان د «د نشه کوونکو ګولیو او چرسو د پېر، پلور او قاچاق، قتل، له واده بهر جنسي اړیکو، نامشروع اړیکو، له کوره تېښتې، تلېفوني اړیکو نیولو، وهل ټکولو او غلا» په تورونو په عام محضر کې په دورو وهلي دي.
د سه شنبې په ورځ د (زمري ۲۱ مه) ۱۶ تنه «د نشه کوونکو ګولیو او چرسو د پېر، پلور او قاچاق» په تور په کابل ولایت کې له ۱۰ تر ۳۹ دوروې وهل شوي دي.
دغه کسان په کابل کې د طالبانو د نشه يي توکو او مسکراتو د مخنیوي ابتدایه محکمې له خوا د اتو میاشتو او درې کلونو تر منځ تنفذي بند باندې هم محکوم شوي دي.
د چهارشنبې په ورځ د (زمري ۲۲ مه) په پکتیا، خوست او سرپل ولایتونو کې د څلورو ښځو په ګډون ۲۴ تنه د «قتل، له واده بهر جنسي اړیکو، نامشروع اړیکو، له کوره تېښتې، تلېفوني اړیکې، وهل ټکولو او غلا» په تور په عام محضر کې په دورو وهل شوي دي.
د طالبانو سرتېرې محکمې لیکلي، یو تن د «قتل» په تور په پکتیا ولایت کې په عام محضر کې ۳۰ دورهې و وهل شو.
دغه کس په ځدراڼ ولسوالۍ کې د طالبانو د ابتدایه محکمې له لوري په یوه کال تنفذي بند هم محکوم شوی دی.
یادې محکمې په یوه جلا اعلامیه کې لیکلي، په خوست ولایت کې دوه تنه د «قتل، له واده بهر جنسي اړیکې او نامشروع اړیکې» په تور په عام محضر کې ۳۹ دورې و وهل شول.
دغه کسان د خوست ولایت په علي شېرو ولسوالۍ کې د طالبانو د ابتدایه محکمې له خوا په درې کاله تنفذي بند هم محکوم شوي دي.
د طالبانو د سترې محکمې د اعلامیې پر اساس د څلورو ښځو په ګډون ۲۱ تنه«له کوره تېښتې، تلېفوني اړیکو ټینګولو، وهلو ټکولو، غلا، واده نه بهر جنسي اړیکې او قتل» په تور په سرپل ولایت کې په عام محضر کې له ۲۵ تر ۳۹ دورو وهل شوي شوي.
دغه کسان د سرپل ولایت په ګوسفندي ولسوالۍ کې د طالبانو د ابتدایه محکمې له خوا د اتو میاشتو او درې کلونو په تنفذي بند هم محکوم شوي دي.
طالبانو د تېرې اوونۍ په جریان کې د یوې ښځې په ګډون ۳۸ تنه په شپږو ولایتونو کې د بېلا بېلو تورونو له امله په عام محضر کې په دورو وهلي وو.
