په افغانستان کې له شپږم ټولګي پورته نجونو پر مخ د ښوونځیو تړل کېدو په ۱۴۲۲ مه ورځ ملګرو ملتونو (United Nations)په یوه اعلامیه کې ویلي، زده کړې یو انساني حق دی.
رخشانه: دغه بنسټ نن (چهارشنبې د زمري ۲۲ مه) پر خپله اېکس پاڼه د یوې اعلامیې په خپرولو سره لیکلي، ښځې او ځوانې نجونې په ډېری هېوادونو کې له تبعیض سره مخ او څنډې ته کړای شوې او ښوونځي ته د لاس رسي له نابرابرۍ سره مخ دي.
طالبانو د ۲۰۲۱ په اګست میاشت کې واک ته تر بیا رسېدو وروسته له شپږم ټولګي پورته نجونو پر مخ د ښوونځیو دروازې وتړلې.
څه موده وړاندې د ملګرو ملتونو د ماشومانو د ملاتړ صندوق (یونیسف) اعلان کړی و، چې یوازې سږ کال ۴۰۰ زره نجونې په افغانستان کې له زده کړو بې برخې شوې دي.
په ملګرو ملتونو پورې تړلي دغه بنسټ په وینا، په دې شمېر سره په افغانستان کې له زده کړو د بې برخې نجونو شمېر ۲.۲ میلیون تنو ته رسېدلی دی.
یونیسف خبرداری ورکړی وو، چې که له زده کړو د نجونو مخنیوی تر ۲۰۳۰ کال پورې دوام وکړي، نو په افغانستان کې به له ابتدايي دورې ورو پورته څلور میلیونه نجونې له زده کړو بې برخې شي.
ملګرو ملتونو لیکلي، د یاد بنسټ د ښځو څانګې د شمېرو له مخې، دا مهال په ټوله نړۍ کې ۱۵ میلیونه نجونې او ۱۰ میلیونه هلکان له زده کړو بې برخې دي.
د ملګرو ملتونو د ښځو څانګې ژمنه کړې، چې د ټولو لپاره د یوې ښې راتلونکې برابرولو په پار د هر اړخیزه زده کړو د ترویج هڅې کوي.
یاد بنسټ ټینګار کړی، چې تر ۲۰۳۰ پورې باید په برابره توګه د ښځو او نارینه وو لپاره، د پوهنتون په ګډون د ارزانه او کیفیت لرونکو، تخنیکي، مسلکي او لوړو زده کړو ته د لاس رسي زمینه باید ډاډ منه شي.
