د امریکا د بهرنیو چارو وزارت د طالبانو تر واک لاندې افغانستان کې د بشري وضعیت په اړه خپل راپور کې ویلي، دغه ډله د جګړې لپاره د ماشوم د ګمارنې او جذب د مخینوي پر خلاف سلګونه ماشوم سرتېري لري.
رخشانه: د امریکا د بهرنیو چارو وزارت په راپور کې، چې په ۲۰۲۴ کال کې یې په افغانستان کې د بشري حقونو وضعیت څېړلی راغلي، ملګرو ملتونو په ۲۰۲۳ میلادي کال کې د طالبانو له لوري د ۳۴۲ هلکانو ګمارنه او په جګړه او ملاتړۍ رولونو کې د هغوی کارول مستند کړي دي.
په دې راپور کې چې د ملګرو ملتونو، د افغانستان لپاره د دې بنسټ د ځانګړي راپور ورکوونکي او رسنیو د راپورونو په استناد چمتو شوی ویل شوي، ۱۵۰ تنه ماشومان په جګړه کې د سرتېرو په توګه او ۱۹۲ نور یې د «د ملاتړۍ په رول کې» کارول شوي دي.
د امریکا د بهرنیو چارو وزارت په راپور کې راوړل شوي، طالبانو بدخشان کې کابو ۳۰ هلکان چې عمرونه یې د ۱۰ او ۱۸ کلونو تر منځ دي ګمارلي او په یوه ځانګړي نظامي مرکز کې یې هغوی ته نظامي زده کړې ورکړې دي.
د دې راپور پر بنسټ په بدخشان کې د طالبانو والي، د دغه ماشومانو کورنیو ته خبرداری ورکړی، چې د ماشومانو په ګمارنه شکایت ونه کړي او یا د هغوی د زده کړو په بهیر کې لاس وهنه ونه کړي.
د امریکا د بهرنیو چارو وزارت ویلي، طالبانو د ۲۰۲۳ میلادي کال د اپریل نه د ۲۰۲۴ کال تر مارچ پورې ماشوم سرتېري ګمارلي او یا یې [هغوی په جګړه] کې کارولي دي.
