د ملګرو ملتونو علمي او تعلیمي سازمان (یونسکو) په افغانستان کې له شپږم ټولګی پورته نجونو پر مخ د ښوونځيو تړل کېدو په یو زر څلور سوه او دوه ویشتمه ورځ اعلان وکړ، چې د طالبانو په څلورکلنه واکمنۍ کې ۲.۲ میلیونه نجونې له زده کړو بې برخې شوې دي.
رخشانه: یونسکو نن(پنشنبې د زمري ۲۲ مه) د یوه راپور په خپرولو سره لیکلي، طالبانو د ۲۰۲۱ په اګست کې واک ته له بیا رسېدو وروسته په افغانستان کې د ښځو او نجونو پر وړاندې له ۷۰ څخه زیات فرمانونه صادر کړي او هغوی یې له عمومي ژوند څخه لرې کړې دي.
د ملګرو ملتونو علمي او تعلیمي سازمان ویلي، افغانستان په نړۍ کې یوازینی هېواد دی، چې په کې نجونې له شږم ټولګي پورته او پوهنتونونو کې د لوړو زده کړو اجازه نه لري.
په ملګرو ملتونو پورې تړلي دغه بنسټ زیاته کړې، د طالبانو په واکمنۍ کې ښځینه خبریالانې هم په تدریجي ډول د خبریالۍ له برخې ایستل کېږي.
د یونسکو د راپور پر بنسټ، پر افغانستان د طالبانو په څلور کلنه واکمنۍ کې له ۸۰ سلنه زیاتو ښځینه خبریالانو او رسنیزو کارکوونکو خپلې دندې له لاسه ورکړې دي.
یونسکو د طالبانو د امربالمعروف قانون ته په اشارې وايي، د دې قانون پر بنسټ په رسنیو کې د ساه کښو انځورونه خپرول او په راډیوګانو کې د ښځو غږ بند شوی دی.
یونسکو د زده کړې حق د خبرو وړ نه بولي او له نړیوالې ټولنې یې غوښتي، چې پر طالبانو دیپلوماتیک فشارونه روان وساتي او له ځنډ، قید او شرط پرته یې په بېړنۍ توګه د افغان ښځو او نجونو پر مخ د ښوونځیو او پوهنتونو د پرانستل کېدو غوښتنه کړې ده.
