هغه ناستې چې ټاکل شوې څو ورځې وروسته د اسلام آباد په کوربه توب او د افغانستان د یو شمېر سیاسي څېرو او ښځو د حقونو د فعالانو په ګډون پاکستان کې جوړه شي، ګڼ غبرګونونه راپارولي دي.
رخشانه: ټاکل شوې دغه دوه ورځنۍ ناسته اسلام آباد ښار کې «د یووالي او باور په لور سیمه ییزه خبرو» تر عنوان لاندې د یو شمېر سیاسي څېرو او ښځو د حقونو د فعالانو په ګډون جوړه شي.
د طالبانو د واکمنۍ له څلور کلن کېدو وروسته دا لومړی ځل دی، چې ټاکل شوې پاکستان د طالبانو د مخالفانو د یوې غونډې کوربه توب وکړي، خو د دې غونډې جوړېدو ګڼ غبرګونونه راپارولي دي.
تېره ورځ (شنبې د زمري ۲۵ مه) د افغان سولې لپاره د امریکا پخواني ځانګړي استازي زلمي خلیلزاد د طالبانو د مخالفانو د غونډې د کوربه توب له امله پر پاکستان نیوکه وکړه.
نوموړي د افغانستان او پاکستان تر منځ د باور کمېدو خبرې وکړې او لیکلي یې دي، د اسلام آباد دغه اقدام ښايي پرعکس پایله ولري.
د خلیلزاد له دریځ نیولو وروسته د ښځو د حقونو یو شمېر فعالانو او ځینو سیاسي څېرو خلیزاد ته په خطاب کې ویلي، د هغه خبرې غیر مسوولانه دي او ښځې او د خلکو استازي باید د هېواد د راتلونکې په اړه خبرې اترې وکړي.
د افغانستان د ولسي جرګې پخوانۍ غړې فوزیې کوفي نن(یکشنبې د زمري ۲۶ مه) په خپله اېکس پاڼه د یوه پوسټ په خپرولو سره لیکلي، ښځې، د سیاسي او مدنې ټولنې استازي باید له یو بل سره لیدنې ولري او د هېواد د راتلونکې او ښځو په اړه باید خبرې اترې وکړي.
مېرمن کوفي د افغان ښځو او نجونو د حقونو او اساسي خپلواکیو پر وړاندې د طالبانو محدودیتونو ته په اشارې، دغه محدودیتونه«په نړۍ کې تر ټولو ځپوونکي» وبلل.
هغې زیاته کړې، د سیمې له هېوادونو سره اړیکې د افغانستان پر وضعیت په اغېزې کولو کې کلیدي رول لري او له پاکستان څخه د دواړو هېوادونو د خلکو تر منځ د باور رامنځ ته کولو په لورد خبرو اترو د فضا برابرولو څخه د یوه مثبت ګام په توګه باید هرکلی وشي.
د استازو جرګې دغه پخوانۍ غړې د خلیلزاد دریځ ته په اشارې لیکلي«آیا هغه وخت نه دی رارسېدلي، چې موږ خپله ځان ته اجازه ورکړو، هغه څه چې زموږ لپاره ښه دي، جوړ کړو؟»
په ورته وخت د افغانستان د خلکو د اسلامي یووالي ګوند مشر محمد محقق هم د خلیلزاد د دریځ په تړاو په خپله فسبوک پاڼه لیکلي، هغه«د هېواد د اوسني وضعیت او ټولو هدفي وژنو او د افغانستان د پخوانیو ناخوالو اصلي لامل دی.»
ښاغلي محقق د خلیلزاد او د هغې د مېرمنې شرل بنارد دریځ د طالبانو په ګټه وباله او هغه یې غیر منطقي او د دیموکراسۍ او بیان د آزادۍ خلاف بللی دی.
دغه سیاسي څېرې له پاکستان څخه د یوه دوست او ورور هېواد په توګه یادونه کړې وايي، د دغه ناستې چې د پاکستان په کوربه توب جوړېږي، ګډونوال ښځینه فعالانې او د طالبانو مخالفان دي.
ښاغلي محقق د پاکستان له لوري د دې غونډې د کوربه توب د خلیلزاد په دریځ نیوکه کړې او د هغه څرګندونې یې غیر مسوولانه بللې دي.
نوموړي د دې غونډې له ترسراوي هرکلی کړی او له خلیلزاد یې پوښتلي«د هغه په اند که د افغانستان ښځې د دې غونډې جوګه نه دي، نو څوک باید دا ناسته تر سره کړي؟ د خراسان داعش او که د طالبانو د امربالمعروف ځواکونه؟»
د ښځو د حقونو فعالې ګل چهره یفتلي هم د خلیلزاد په دریځ نیوونې غبرګون ښولی او په خپله اېکس پاڼه یې په یوه پوسټ کې لیکلي، د خلیلزاد موخه د افغانستان خپلواکي نه ده.
هغې لیکلي خلیلزاد هڅه کوي د دوحې د تړون د لاسلیک کولو پخوانی ریکارډ له منځه یوسي او ځان د «عدالت او دیموکراسۍ اتل» په توګه د نوي انځور سره بیا جوړ کړي.
د ښځو د حقونو دغې فعالې په ټينګار زیاته کړې، د افغانستان د خلکو لپاره د رول دا بدلون، د هغو سیاستونو یادونه ده، چې د کلونو کړاونو او وینو تویولو لامل شوي دي.
