د افغان ښځو د سیاسي ګډون شبکې د اعتراضي غورځنګ غړو پر هېواد د طالبانو واکمنۍ د څلورمې کلیزې په درشل کې وايي، هغه څه چې افغانستان کې پر ښځو تېرېږي نه یوازې د یوه ملت له بشري حقونو سرغاړوی، بلکې یو څرګند جنسیتي توپیر دی.
رخشانه: دغه اعتراضي غورځنګ نن (شنبې د زمري ۲۵ مه) په یوه اعلامیه کې لیکلي«د اګست ۱۵ مه هغه ورځ ده، چې د میلیونونه افغان شځو هیلې په کې تیارې ته ولاړې.»
اعلامیه کې د افغان ښځو او نجونو د حقونو او اساسي خپلواکیو پر وړاندې د طالبانو پراخو محدودیتونو ته په اشارې راغلي، د دې محدودیتونو له لګېدو وروسته «په ګڼو میدانونو د ښځو غږ چوپ کړای شوی دی.»
معترضو مېرمنو ویلي، له ښځو پرته هېڅ ټولنه ژوندۍ نه پاتېېږي او هېڅ سوله به له عدالت پرته تل پاتې نه وي.
هغوی له نړیوالې ټولنې د افغان مېرمنو د عملي ملاتړ غوښتنه کړې وايي، پر طالبانو فشار راوړل باید «واقعي وي، نه تشریفاتي.»
د افغان ښځو د سیاسي ګډون شبکې غړو ټينګا کړي، چې د اګست ۱۵ مه د دوی لپاره مقاومت، زده کړو او خپلواکۍ ته ژمنتیا ده او مقاومت به یې «تر هغې ورځې چې هېڅ نجلۍ د ښځینه توب په جرم د ژوند له حق څخه محرومه نه شي» دوام ولري.
په ایران کې د افغانستان د روزنه امید سازمان اعتراضي مېرمنو هم پرون د «اګست ۱۵ مه» د افغانستان د نسکورېدو د څلورمې کلیزې په درشل کې د افغان مېرمنو د غږ اورېدو او هغه څه چې افغان مېرمنې د طالبانو په واکمنۍ کې ورسره مخ دي په پار، په اعتراضي توګه خپلې شونډې تړلې وې او د طالبانو له واکمنۍ څخه یې خپله ناخوښي وښوده.
