سیمه ییزې سرچینې وايي، ناپېژانده وسله والو کسانو د ننګرهار ولایت سره رود ولسوالۍ کې د یوه پخواني نظامي د کورنۍ د درې نجونو، یو هلک، یوې ښځې او یوه سپین ږیري په ګډون شپږ غړي وژلي دي.
رخشانه: ننګرهار کې سیمه ییزه سرچینو ویلي، دغه پېښه د دوشنبې شپه( د زمري ۲۷ مه) د دې ولایت د سره رود ولسوالۍ په سلطان پور چینه کې رامنځ ته شوې ده.
د سرچینې په وینا، پېښه هغه مهال رامنځ ته شوې، چې ناپېژانده وسله وال کسان یوه کور ته ننوتي او د دغه کور پر غړو یې ډزې کړې دي.
سرچینې زیاته کړې، په دې پېښه کې درې ماشومې نجونې، یو هلک، یوه مېرمن او یو سپین ږیری وژل شوي دي.
د سرچینې د خبرو پر بنسټ، د پېښې قرباني شوي ماشومان له ۳ تر ۹ کلونو پورې عمرونه لري.
دا شپږ کسان د اسفندیار په نوم د یوه پخواني نظامي د کورنۍ غړي دي، چې هغه خپله دا مهال په المان کې ژوند کوي.
په دې پېښه کې د کارول شوې وسلې د نوعیت او وسله والو کسانو د شمېر په اړه څه نه دي ویل شوي.
تر اوسه پورې ځايي طالب چارواکو هم په دې اړه نظر نه دی څرګند کړی.
