بغلان ولایت کې د طالبانو امنیتي چارواکي وايي، د بغلان- کابل پر لویه لار د یوې ترافیکي پېښې په ترڅ کې ۲۴ تنه ټپیان شوي دي.
رخشانه: بغلان کې د طالبانو امنیه قوماندانۍ د یوې خبرپاڼې په خپرولو سره ویلي، دغه پېښه تېره نیمه شپه«پنشنبې د زمري ۳۰ مه» د دې ولایت د دوشي ولسوالۍ مکتب سنګ سلاخ سیمه کې رامنځ ته شوې ده.
د خبرپاڼې له مخې، پېښه هغه مهال رامنځ ته شوه، چې یوه مسافر وړونکي ۵۸۰ موټر له یوه باروړونکي موټر سره ټکر وکړ.
خبرپانه کې راغلي، په دې پېښه کې د ښځو او ماشومانو په ګډون ۲۴ تنه ټپیان شوي، چې دا مهال د بغلان په ولایتي روغتون کې تر درملنې لاندې دي.
بغلان کې د طالبانو د امنیه قوماندانۍ خبرپاڼه وايي، د دغې ترافیکي پېښې د ځینو ټپیانو روغتیايي حالت نازک دی.
طالب پولیسو که څه هم د یادې پېښې د مړو شویو کسانو شمېره نه ده ښودلې، خو ځینې عیني شاهدان وايي، په پېښه کې د دواړو موټرو چلوونکو ژوند له لاسه ورکړی دی.
د پېښې یو شاهد ویلي، ۵۸۰ ډوله مسافر وړونکی موټر د اتفاق فاریاب ترانسپورتي شرکت اړوند دي.
دا په داسې حال کې ده، چې دوه ورځې وړاندې د هرات ګذرې ولسوالۍ کې د یوې ترافیکي پېښې له امله د ښځو او ماشومانو په ګډون ۷۴ تنو ژوند له لاسه ورکړی وو، چې ډېری قربانیان یې له ایران نه راستانه شوي کډوال دي.
بل خوا راپورونه وايي، د هلمند ګرمسېر ولسوالۍ کې یو ټېکټر هلمند سیند ته لوېدلی، چې له امله یې د ښځو او ماشومانو په ګډون ۱۲ تنه مړه شوي دي.
سرچینې وايي، دغه کسان له ګرمسېر ولسوالۍ نه ناوې ولسوالۍ ته روان وو، چې ټېکټر یې هلمند سیند ته ولوېده.
د سرچینې په وینا، د ګرمسېر اوسېدونکو چې ټېکټر یې له سیند په کښتۍ کې د تېرېدو پر مهال اوبو ته لوېدلی دی.
ویل کېږي په دغه پېښه کې درې ښځو او ۹ ماشومانو ژوند له لاسه ورکړی او ۴ نور ټپیان شوي دي.
راپورونه دا هم وايي، طالب ځواکونو ۱۴ تنه نور ژغورلي، سیمه ییزه طالب چارواکو تر اوسه په دې اړه څه نه دي ویلي.
